Omavandururiro 17 - Herero Revision Bible (HRR)

Omukorondu omutjiukwa

1 Okuzambo umwe wovaengeri mba hambombari, mba ri noviyaha mbi hambombari, we ere ku ami na tja: “Indjo, nami me ku raisire kutja omukorondu ngwa ingana ma verwa vi, ihi otjihuro otjinene tji tja tungwa popezu notupa otuingi twonḓonḓu. 2 Ozombara zouye za tjitire otuvakiro nomukazendu ngwi, novature wokombanda yehi va purukisiwa mokunwa omavinu woruvakiro rwe.”

3 NOmbepo ya Ndjambi otji ya honapara mu ami, nomuengeri e ndji twara kokuti onguza. Koṋa ngo ami mba kamuna ko omukazendu ngwa kavire kotjipuka otjiserandu, tji tje urire omana omayamburure ku Ndjambi morutu aruhe; otjipuka hi tja ri noviuru hambombari nozonya omurongo. 4 Omukazendu ngwi wa hwikikirwe nozombanda ozoserarovazu nozoserandu pyu, nu wa harekerwe noviwerawere ovingoldo, nomawe omahuze, noundjendje ouwa, nu meke re wa ri notjinwino tjongoldo tji tje urire noviṋa vyombonḓi noviyaukise otja otjiraisiro tjotuvakiro twe. 5 Nu motjipara tje mwa tjangerwe ena nda ri nomaheero omaundikwa. Ena ndi ra ri: “Babilon otjinene, ina yovakorondu avehe noyoviyaukise avihe mouye.” 6 Nami e munu kutja omukazendu ngwi wa purukisiwa i ombinḓu yotjiwaṋa tja Ndjambi, nombinḓu ya imba mba ṱira okuhongonona Jesus.

Omaheero wotjipuka

Nami tji mba muna omukazendu ngwi, mba kuminwe tjinene. 7 Nomuengeri e ndji pura a tja: “Okutjavi tji wa kumwa? Ami me ku raere omaheero omaundikwa womukazendu ngwi nowotjipuka tji tje mu toora, ihi otjipuka tji tji noviuru hambombari nozonya omurongo. 8 Otjipuka hi tji wa munine, tja ri po nu nambano katji tji po; otjo tji ri pokupita morutjiva rwotjovakoke tji yaruke kombandjarero. Ovature wokombanda yehi mbe nomana nge ha tjangerwe membo romuinyo okuza kombutiro youye, mave kumwa avehe tji mave munu otjipuka hi. Otjo tja ri po, nu nambano katji tji po, nungwari maatji kakara po.

9 “Poṋa mba mape hepwa ounongo nozondunge. Oviuru mbi hambombari ovyo ozondunda hambombari ku kwa haama omukazendu ngwi. Ovyo wina ozombara hambombari. 10 Ozombara nḓa ndano ozondenga za wire, imwe ingee ondji honapara, nu indji osenina kaiye ya. Nu tji ye ya, i sokuhonapara oruveze orusupi uriri. 11 Notjipuka tji tja ri po, nu nambano tji tji he ri po, otjo otjini ombara oitjahambondatu, ndji ri imwe yainḓa hambombari, nu ndji mai yaruka kombandjarero.

12 “Ozonya nḓa omurongo nḓu wa munine ozo ozombara omurongo. Ozo ingee kazeya uta okuhonapara, nungwari maze pewa ouvara okuhonapara otja ozombara oiri imwe puna ihi otjipuka. 13 Nozo azehe pamwe ze nondando tjingeyo imwe, nu ze yandja omasa nouvara wazo kotjipuka. 14 Ozo maze rwisa Ondjona movita; nungwari indji Ondjona pamwe novakongorere vayo ovaṱakame mbuya isana nokutoorora mai ze toṋa, tjinga ai ri Ombara yozombara noMuhona wovahona.”

Ombandjarero yomukazendu omukorondu

15 Nomuengeri wina wa tjere ku ami: “Omeva nga ngu wa muna nu pu pa haama omukazendu omukorondu owo oviwaṋa nomihoko novanavisenginina nomaraka wovandu. 16 Ozonya nḓa omurongo nḓu wa muna notjipuka mavi tondo omukazendu omukorondu ngwi; ovyo mavi mu yeka oviṋa avihe mbye na vyo navi mu esa mutundu; novyo mavi ri onyama ye navi mu ningiririsa momuriro. 17 Ndjambi wa ṱunine omitima vyavyo kutja vi tjite avihe otja kombango ye: Ovyo vi nondandero tjingeyo imwe, nu vi yandja ouvara wavyo wokuhonapara kotjipuka nga omambo wa Ndjambi tji ya yenenisiwa.

18 “Nomukazendu ngwi ngu wa munine eye otjihuro otjinene tji tji nouvara wokuhonaparera ozombara ozengi.”