Ndjambi eye Ombara Onenenene youye auhe
(1Eku 16:23-33)1 Imburireye Muhona eimburiro epe!
Imburireye Muhona,
vature wouye amuhe!
2 Imburireye Muhona,
nu mu mu tange!
Eyuva arihe zuvariseye ombuze
ombwa yokutja eye we tu yama.
3 Zuvariseye omasa we koviwaṋa,
novitjitwa vye ovihimise
komihoko avihe!
4 Muhona eye omunamasa,
neye wa pu pokutangwa;
eye u sokupewa ondjozikiro
poomukuru wovisenginina avehe.
5 Oomukuru voviwaṋa avihe vyarwe
owo oviserekarera vyovisenginina porwavyo,
nungwari Muhona ongwa memene omayuru.
6 Ohivirikiro nounene we
oumanisa vye mu kondoroka,
omasa noupwe vi urisa ondjuwo ye.
7 Tangeye Muhona,
viwaṋa amuhe kombanda yehi;
tangeye ounene nouvara we!
8 Tangeye ena ra Muhona enandjozikiro,
eteye ozombunguhiro nu mu hite mondjuwo ye.
9 Rikotameneye komurungu wOmuyapuke,
nu zezereye komurungu we, mahi amuhe.
10 Tjiviseye nai koviwaṋa avihe:
“Muhona eye Ombara!
Ouye wa zikamisiwa nomasa,
nu kamaau teratera.
Muhona ma pangura oviwaṋa nousemba.”
11 Hi nevaverwa,
yorokeye!
Kuvare na imbi ovinamuinyo mbi ri move,
zuzuma!
12 Mahi omakunwa na imbi avihe mbi ri mu eṋe,
yorokeye!
Omiti momahwa mavi imbi nondjoroka
13 komurungu wa Muhona,
eye tji meya okupangura ehi.
Eye ma pangura oviwaṋa vyouye
nousemba nouatjiri.
© Herero Revision Bible © Bible Society in Namibia, 2021.
