Ndjambi omuyame wetu
1 Ngu ma paha omaundiro mu Muhona,
nu ngu ma kara mondjamo yOmunamasaaehe,
2 ma yenene okutja nai ku ye:
“Oove omuyame wandje omunamasa.
Oove Ndjambi wandje ku mbe riyameka.”
3 Eye, tjiri, me ku yama koviwonga avihe oviundikwa,
na komitjise avihe omizeu.
4 Eye me ku vandeke novivava vye;
nu kehi yavyo omu mo munu mo ondjamo;
ouṱakame we mau ku yama nu mau ku yeura.
5 Ko nokuhepa okutira oviwonga uṱuku,
nomarwisiro watjimanga mutenya,
6 nomutjise omuzeu mbu ya monḓorera,
nomaumba nge nyona mutenya.
7 Nandarire kutja eyovi rimwe mari
ṱire meṋe yoye poo omayovi omurongo
okukukondoroka,
kove kamaaku ṱunu otjipo.
8 Nomeho woye omuini mo munu Ndjambi,
tji ma vere imba avehe mbe mu nyengura.
9 Orondu Muhona eye omaundiro woye,
nu ingwi wOkombandambanda eye
omuyame woye.
10 Otjiwonga otji tji hi nokuya kombanda yoye,
nozondjito zoutwe otji ze hi nokuvaza koyoye.
11 Ndjambi me ku rakizire ovaengeri
kutja ve ku tjevere akuhe ku mo i.
12 Owo mave ku tjindi momake
wawo kutja o ha putara mewe.
13 Mo kara nomasa kombanda
yozongeyama ovindandi
nozonyoka zouzuwo.
14 Ndjambi ma tja nai:
“Ami me yama imba mbe ndji suvera,
nu me vatere imba mbe
ndji i kutja owami Muhona.
15 Owo tji mave ku ku ami,
ami meve zuvire;
tji ve ri mombamisiro,
ami me kara puna wo,
meve kutura nu e ve yozike.
16 Meve pe okuhupa orure,
nowo mave munu ombatero,
ndji va undja.”
© Herero Revision Bible © Bible Society in Namibia, 2021.
