Ondjuriro yombatero
Eimburiro. Epsalme rovazandu va Kora. Komuimburise.
1 Muhona Ndjambi, omuvatere wandje,
ami aruhe me ku kove,
nouṱuku me uru komurungu woye.
2 Zuvira ongumbiro yandje;
puratena kondjuriro yandje
yokuningira ombatero!
3 Omaumba omengi ya wira kombanda yandje,
nga tji mbi ri popezu nonḓiro.
4 Ami mbi ri otja ovandu
avehe mba mbe ri pokukoka;
omasa wandje aehe ya yanda mba.
5 Ami mba isiwa mokati kovakoke;
mbi ri otja ovaṱi mbe ri momaendo wawo.
Ove ko tji rizemburuka na wo rukwao,
ombatero yoye kai vaza ku wo.
6 We ndji yumba mourekoto weyendo,
motjitoto tjonḓorera notjikoto tjinene.
7 Omazenge woye ya havere kombanda yandje,
nove we ndji ṋiṋikizire pehi
nozongazona zoye azehe.
8 Ove wa humburura ovatjiwasane
vandje kokure na ami;
we ndji ririsa otjiyaukise ku wo.
Mbi ri momapando, notji mbi hi nomatauriro;
9 omeho wandje ya
ngundiparisiwa i omatetarero.
Muhona, eyuva arihe mbi kwa kove,
nu mbi yera omake wandje kove mongumbiro.
10 Mo tjiti ovihimise kovakoke are?
Ovaṱi indu mave penduka okukutanga are?
11 Otjari tjoye maatji kaserekarerwa meyendo,
nouṱakame woye maau
kaserekarerwa motjovakoke are?
12 Oviungura vyoye ovihimise
mavi tjiukwa monḓorera,
poo ousemba woye mehi rovazembwa are?
13 Nungwari, Muhona,
ami me ku ombatero kove,
omuhuka auhe me kumbu kove.
14 Mo ndji nakaurire tjike, Muhona?
Mo horekere tjike omurungu woye ku ami?
15 Okuza kouṱiṱi wandje ami mba ningisa
ondjenda nu mba ri pokukoka;
mba pungarisiwa i omutwaro womberero yoye.
16 Omapindi woye omazeu maye ndji ṱukuṱura,
nondirisiro yoye mai ndji yandeke.
17 Oyo mai ndji kovere eyuva
arihe tjimuna omupupo
mbu mau ya kombanda yandje okuza kominda avihe.
18 Ove wa humburura omapanga novatjiwasane vandje
kokure na ami,
nonḓorera porwayo ondji ri epanga randje.
© Herero Revision Bible © Bible Society in Namibia, 2021.
