Ongumbiro yokuhavera ovanavita na Israel
Epsalme ra Asaf. Eimburiro.
1 Ndjambi, o kara pokumwina;
o hirimana nu o mwina ko!
2 Tara, ovanavita na ove mave zungana;
imba mbe ku tonda mave ku sekamene.
3 Owo mave ripurire otjiwaṋa tjoye ovineya;
mave woronganene okutjita
ouvi ku imba mbe unda move.
4 Owo ve tja nai: “Indjeye,
tu yandeke otjiwaṋa tjawo,
atji ha kara po, kutja ena ra Israel
ari ha tamunwa ko rukwao.”
5 Va zuvasana momeripuriro wawo,
nave rikutu kumwe okukusekamena:
6 Imba Ovaedom nOvaismael
nOvamoab nOvahagari,
7 imba Ovagebal nOvaamoni nOvaamalek
nOvafilisti novature va Tirus.
8 Ovaasirie wina ve rikuta kuna wo
nave rire otjira otjinamasa
tjozondekurona za Lot.
9 Tjita ku wo otja tji wa tjita kOvamidian,
na ku Sisera na Jabin poruronḓu Kison.
10 Ove we ve yandekera mOen-Dor,
noturova twawo twa karira ombumbi mehi.
11 Tjita kovanane vawo otja tji wa tjita
ku Oreb na Seeb;
yandeka ovahongore vawo otja tji
wa tjita ku Seba na Salmuna,
12 mba tja: “Ngatu kambure ehi
ra Ndjambi ri rire ouini wetu.”
13 Ve piza otja oruuma, Ndjambi wandje,
notja oviyaya mbi mavi hingwa i ombepo.
14 Otja omuriro mbu mau ningiririsa omahwa,
notja otururumo tu matu nyosa ozondundu,
15 nga rire tji we ve ramba notjivepo
tjoye nokuvetirisa
norukumbambura rwoye orundandi.
16 Tjitukisa omirungu vyawo vi
raise ohoṋi, Muhona,
ve tjiwe omasa woye pu ye ṱeki.
17 Ngave ṱohoṋi nu ve tirisiwe nga aruhe;
ngave ṱe mondjambu porwayo.
18 Ngave tjiwe kutja ove erike oove
ngu u ri Muhona,
ngu u ri owOkombandambanda yehi arihe.
© Herero Revision Bible © Bible Society in Namibia, 2021.
