Eimburiro rOmukandi
Komuimburise. Epsalme ra Asaf.
1 Yorokereye Ndjambi, ngu ri omasa wetu;
imburireye Ndjambi wa Jakob ondangero.
2 Uteye eimburiro,
nu mu tone ozonḓukwa;
nyandeye otjiharpe
notjihumba tjombosiro ombwa!
3 Posiseye ozohiva mokutendama
kwomueze na motjiyeraori
mEyuva retu enene!
4 Orondu inga owo omazikamisiro mOisrael,
nomaraerero wa Ndjambi wa Jakob.
5 Ndjambi we ye zikamisira otjiwaṋa tja Israel,
indu eye tja rwisa ehi ra Engipte.
Ami mba zuva eraka,
ndi mbi ha tjivirwe, amari tja nai:
6 “Ami mba isa ko omitwaro koviṱuve vyeṋu;
mba tjita kutja mu herure
ovimbamba vyeṋu vyozohima.
7 Tji mwa ri mombamisiro,
eṋe mwa kwa ku ami,
nami e mu vatere.
Mba itavera ku eṋe motjikamba tjoruṱuṱumo,
nu mbe mu rorera
pomeva wa Meriba.
8 Zuva komaronga wandje,
tjiwaṋa tjandje;
Israel, tjiri, andakuzu mo puratene ku ami!
9 Amu ha kara omukuru
wozonganda mokati keṋu,
nu amu rikotamene komukuru warwe!
10 Owami Muhona, Ndjambi weṋu,
ngu mbe mu pitisa mehi ra Engipte,
Mwahurureye ovinyo vyeṋu,
mbi mu parure.
11 “Nungwari otjiwaṋa tjandje katji
puratenene ko keraka randje;
Israel katji karere nonḓuviro ku ami.
12 Ami opu mba za okuveesa ve
tware ozondjira zawo zourangaranga,
nu ve tjite oviṋa avihe,
mbi mave vanga.
13 Tjiri, andakuzu otjiwaṋa tjandje tja
puratena ku ami,
nu Israel andakuzu tja kara
nonḓuviro ku ami,
14 etje hakahana okuhavera ovanavita
na tjo nokunata ovetjipamise.
15 Imba mbe ndji nyengwa,
atjave ripeta komurungu wandje mondira,
omberero yawo atjai karerera nga aruhe.
16 Etje ku parura novikokotwa oviwaviwa
ne ku kutisa nouitji wozonyutji
mbwa tapwa motuuwa.”
© Herero Revision Bible © Bible Society in Namibia, 2021.
