Okuhuhumiṋiwa momayuva wombamisiro
Komuimburise. Epsalme ra Asaf.
1 Me uru neraka enene ku Ndjambi,
me uru neraka enene,
neye me ndji zuvire.
2 Momayuva wokuyaraara kwandje
ami me kumbu ku Muhona;
ouṱuku auhe me yere
omake wandje mongumbiro,
nungwari omuinyo wandje
wa panḓa okuhuhumiṋiwa.
3 Tji me rizemburuka na Ndjambi, e hekana;
tji me ripura, me mumapara.
4 Eye me ndji kareke katumba ouṱuku auhe;
ami me rikende tjinene,
nga tji mbi hi nokusora okuhungira.
5 Ami me ripura nomayuva nga kapita,
nu me rizemburuka nozombura zarukuru.
6 Ouṱuku mbi ripura tjinene,
mbi rizemburuka ne ripura omuini nai:
7 “Muhona me tu nakaura aruhe are?
Eye kemee tu tjariparere rukwao are?
8 Otjari tje tja yanda nga aruhe are?
Omakwizikiro we indu ya manuka
okuza kozondekurona nga
kozondekurona are?
9 Indu Ndjambi wa zemba okuṱotjari are?
Omazenge we onga yaruka
moruveze rwounyaṋutima we are?”
10 Ami otji mba tja nai:
“Ihi tji matji ndji kendisa tjinene
okongwi okutja omasa wOkombandambanda
wokuvatera ya runduruka.”
11 Ami me zemburuka oviungura
vyoye ovinene, Muhona;
nu me rizemburuka novihimise,
mbi wa tjitire moruveze orukuru.
12 Me ripura novitjitwa vyoye avihe,
nu me rizemburuka nozondjito zoye azehe.
13 Ndjambi, omihingo vyoye ovyo omiyapuke;
kape na Ndjambi ngu ri omunene otja ove.
14 Oove Ndjambi ngu u tjita ovihimise;
Ove wa raisa omasa woye koviwaṋa.
15 Nomasa woye omanene ove
wa kutura otjiwaṋa tjoye,
inḓa ozondekurona za Jakob noza Josef.
16 Omeva tji ye ku muna, Ndjambi,
owo ya zezera;
nourekoto womevakokuvare wa zungana.
17 Ovikamba vya rokisa ombura;
novyo vya ṱuṱuma mevaverwa,
nondjerera yotutjeno twombura
ya yera kominda avihe.
18 Ombosiro yoruṱuṱumo rwoye
ya ri onḓeu tjinene,
nozohanya zorutjeno rwombura
za yera kombanda yehi,
nehi ra nyinganyinga nari zezera.
19 Ove wa kayenda mokati kozongazona;
wa konda okuvare okukoto,
nungwari ozondambo zoye kaze munikire ko.
20 Wa tjindisire otjiwaṋa tjoye otja
ozonḓu neke ra Moses nora Aron.
© Herero Revision Bible © Bible Society in Namibia, 2021.
