EMBO ORITJATATU ROMAPSALME
Ndjambi u pangura osemba
Epsalme ra Asaf.
1 Tjiri, Ndjambi eye omuwa
kotjiwaṋa tja Israel,
ku imba mbe nomitima omikohoke.
2 Nungwari ami mba hara okupandjarisa
omeriyamekero wandje ku Muhona,
nongamburiro yandje ya ri pokuzenga.
3 Orondu ami mba ṱeruru
novanauvi overitongamise,
tji mba muna kutja owo ve nouṋingandu.
4 Owo kave nomihihamo
nu ovaveruke motutu.
5 Ongondjero, ndji kara novandu ovakwao,
kave na yo,
nu kave munu omauzeu otja ovakwao.
6 Owo va zara ourangaranga mozosengo zawo
otja oundjendje
noutwe wawo we ve kutjira otja
ombanda yawo omanise.
7 Omitima vyawo vye ura nourunde tjinene,
ovyo vi ripura nozondjito zouvi.
8 Owo ve nyekerera ovandu varwe,
nu ve hungira oviṋa vyourunde;
ve ritongamisa nu ve tanda
okuṋiṋikiza ovakwao.
9 Owo ve hungira ouhahu
ku Ndjambi ngu ri meyuru,
nu ve rakiza omambo wourangaranga
kovandu mbe ri kombanda yehi.
10 Otjiwaṋa tja Ndjambi opu tja za
okutanaukira ku wo natji kambura
oupupu mu avihe mbi mave hungire.
11 Owo ve tja nai: “Ndjambi ke na tji ma tjiwa!
Ingwi wOkombandambanda ma tjiwa
vi imbi mbi tjitwa kombanda yehi?”
12 Tjiri, ovanauvi va sana ngo,
owo vena ovingi nu aruhe ve tumbira ko.
13 A ri omungandjo, hapo,
ami tji mbe ritjinda oukohoke,
na tji mba raisa okuhinandjo kwandje.
14 Ndjambi, ove eyuva arihe u ndji hihamisa,
nu ove u ndji vyura omuhuka auhe.
15 Andakuzu ami mba hungirire
oviṋa otja imbi mbi va hungira,
etje tjita ovineya ku imba mbe riyameka kove.
16 Ami otji mba kondja okuripura
nokutjiwa oviṋa mbi,
nungwari ovyo vya ri ovizeu tjinene ku ami,
17 nga tji mba hita mondjuwo yoye.
Otji mba tjiwa oviṋa,
mbi mavi tjitwa kovanauvi.
18 Ove mo ve twa poṋa popaheze,
nu mo ve wisire momanyoneno.
19 Owo, tjiri, va vandekwa tjimanga,
nave munu omaandero omayaukise.
20 Owo ve ri otja oruroto;
omundu tja penduka,
orwo tjandje rwa zengi.
21 Omutima wandje tji wa tetara,
nami tji mbe ripura pevari,
22 otji mba rira eyova ne ha tjiwa otjiṋa;
mba ri otja otjipuka tjokuti.
23 Nungwari ami me panḓere pove;
Ove we ndji kambura pokuoko kwokunene.
24 Mo ndji hongorere nomaronga woye,
nu kombunda mo ndji
yakura mondjingonekero yoye.
25 Otjikwaye tjarwe tji mbi natjo meyuru,
pendje naove erike?
Tji mbi na ove,
hi na tji me hepa kombanda yehi.
26 Orutu nomuinyo wandje nandi vya ngundipara,
Ndjambi eye omasa wandje;
eye onguri avihe mbi me hepa.
27 Imba mbe humburuka kokure na ove,
tjiri, mave manuka;
mo yandeke imba avehe mbe hi
nouṱakame move.
28 Nu ku ami okokuwa okukara popezu na Ndjambi;
omaundiro wandje ye ri mu
Muhona Ndjambi.
Ami me serekarere oviungura vyoye avihe.
© Herero Revision Bible © Bible Society in Namibia, 2021.
