Okukumbira ombara
Epsalme ra Salomo.
1 Honga ombara okupangura nousemba woye, Ndjambi;
i pa ousemba woye omuini,
2 kokutja i pangure otjiwaṋa tjoye mousemba,
nu i honaparere ovanandjenda voye otja kousemba.
3 Ehi ngari kare nouṋingandu kotjiwaṋa,
nu ngari mune ousemba.
4 Ombara ngai pangure
ovasyona nokuhinandoorora,
ngai vatere ovahepe nu i nyone
imba mbe ve tjita outwe.
5 Otjiwaṋa tjoye ngatji kare nondira
kove eyuva ngunda amari yere,
nomueze ngunda amau yandja
ondjerera, okuza komuhoko nga komuhoko.
6 Ombara ngai kare otja ombura
ndji mai tjatja onyase,
notja omata ngu maye ningenisa ehi.
7 Ousemba ngau nyomoke oyo
ngunda ai nomuinyo,
nohange ngai takavare
omueze ngunda amau yere.
8 Ouhona wayo ngau honapare
okuza kokuvare nga kokuvare,
nokuza konḓonḓu Eufrat nga komaandero wehi.
9 Oviwaṋa vyokuti onguza mavi
woro ozongoro komurungu wayo,
novanavita nayo mave riwisire moruuma.
10 Ozombara za Spanie nozomakoverwa
maze i etere oviyandjewa,
nozombara za Araba noza
Etiopie maze i tukururire oviṋa vyondatero.
11 Ozombara azehe ngaze rikotamene ku yo,
noviwaṋa avihe ngavi i karere.
12 Orondu oyo mai yama omuhepauke
ngu ma ku ombatero ku yo,
novasyona naimba mbe hi nomuvatere.
13 Oyo mai tjariparere omusyona nomuhepauke,
nu mai yama ominyo vyawo.
14 Mai ve kutura koṋiṋikizire
na kozondjito zoutwe;
ominyo vyawo ominanḓengu
komurungu wayo.
15 Ombara ngai hupe orure!
Ngai pewe ongoldo ya Araba;
ngai kumbirwe aruhe;
novandu ngave uhare amave i
ningirire ondaya ku Ndjambi.
16 Ngamu kare ovikokotwa ovingi
mehi nga kozondomba zozondundu;
ovyo ngavi takavare
tjimuna imbi vyozondundu za Libanon.
Nu movihuro ngamu takavare ovandu
tjimuna ehozu mokuti.
17 Ena rombara ngari kare po nga ko nga aruhe;
ondangu yayo ngai karerere,
eyuva ngunda amari yere.
Oviwaṋa avihe ngavi i tange,
ngavi ningire Ndjambi kutja e vi sere ondaya,
nu ngavi zerire po ombara ouṋingandu.
18 Muhona, Ndjambi wa Israel nga tangwe,
eye porwe ongu tjita ovihimise.
19 Ena re enene ngari tangwe aruhe nga aruhe;
ounene we ngau urise ouye auhe!
Amen! Amen!20 Inga oomaandero wozongumbiro za David,
omuzandu wa Isai.
© Herero Revision Bible © Bible Society in Namibia, 2021.
