Ongumbiro yokupewa ousemba
Eimburiro roruhoze ra David, nda imburira Muhona ohunga na Kus Omubenjamin.
1 Muhona, Ndjambi wandje,
oove ngu uri omaundiro wandje;
ndji yama nu u ndji kuture kovendjitjere,
2 tjapo owo mave ndji twara otja ongeyama,
nave kendjinyondororera
poṋa pu pe hi nomundjiyame.
3-4 Muhona, Ndjambi wandje,
tjinangara mba tjita ouvi komundu,
nu tjinangara mba hihamisa omukwetu,
poo mba ṱotjari nomundu
ngwe ndji tjita ouvi mouhasemba,
tjinangara mba tjita oviṋa mbi avihe,
5 ovanavita na ami ngave
ndji rambe nu ve ndji kambure,
ngave ndji tombere mehi,
nu ve ndji ese moruuma amba koka!
6 Sekama momazenge woye, Muhona!
Sekamena omapindi wovanavita na ami.
Sekama, Ndjambi wandje, u ndji vatere,
ove u vanga kutja ousemba u yenenisiwe.
7 Woronganisira oviwaṋa avihe pove,
nu vi honaparera okuza kombanda.
8 Oove omupangure woviwaṋa avihe.
Ndji pangura, Muhona,
otja kousemba wandje;
Ove mo tjiwa kutja owami omuhinandjo.
9 Oove Ndjambi omusemba,
u konḓonona omeripuriro nozonḓero zetu.
Yandeka ouvi wovanauvi,
nu u zeuparise ovasemba.
10 Ndjambi eye omuyame wandje,
eye u yama imba mbe nonḓuviro ku ye.
11 Ndjambi eye omupangure omusemba,
nu aruhe u pangura ovanauvi.
12 Tji pe nomundu ngu hi nokuritanaura,
Ndjambi ma upike engaruvyo re;
eye ma rumbire outa we ne u rongerisa.
13 Eye ma toora ovirwise vye ovizepe,
nu me riungurire oviku ovinyose.
14 Tara, ovanauvi tji ve ripura ouvi;
ve tya oumba, nu ve tjita ovineya.
15 Nungwari owo oveni ve kamburwa
mozombate nḓu va yarera ovakwao.
16 Ouvi wawo otji u yaruka mu wo oveni,
notji ve hihamisiwa i
ozondjito zoutwe zawo oveni.
17 Ami me tja okuhepa ku Muhona,
kousemba we,
nu me imburire Muhona
wOkombandambanda ondangero.
© Herero Revision Bible © Bible Society in Namibia, 2021.
