Ondjuriro yombatero
Komuimburise otja kOzongara. Epsalme ra David.
1 Ndji yama, Ndjambi,
orondu omeva ye ri pokundjiṋiṋa.
2 Ami me ṱomwine motjinoko otjikoto,
nu kapena ehi ekukutu pume kurama;
mba hiti mourekoto womeva,
nozongazona zeri kombanda yandje.
3 Ami mba urisiwa i okuravaera kwandje,
nomuriu wandje wa kangara,
nomeho wandje maye tetara,
tjinga ambi undja ku Ndjambi wandje.
4 Imba mbe ndji nyengwa uriri
owo ovengi pozondjise zandje motjiuru.
Ovanavita na ami ve kora ovizeze ohunga na ami;
owo ve nomasa, nu ve vanga okundjizepa.
Ve tjita kutja mbi yarure oviṋa,
mbi mbi ha pundire.
5 Ndjambi, ove u tjiwa ouyova wandje,
nouvi wandje kaye na pu ya horekwa kove.
6 O yandjere kutja mbi ṱise imba
mbe riyameka kove ohoṋi,
Muhona Ndjambi Omunamasaaehe!
O yandjere kutja mbi yamburure
imba mbe rikotamena kove,
Ndjambi wa Israel!
7 Orondu ami mba yambururirwa ove,
omurungu wandje wa vandekwa i ohoṋi yandje.
8 Mbi ri otja owozonganda
komarumbi novangu vandje,
notja owambangu kovazamumwe vandje.
9 Orondu orusuvero rwandje
rwokukondjera ondjuwo yoye
rwa seseta omasa wandje,
nomayambururiro wa imba mbe ku yamburura,
ya wira kombanda yandje.
10 Ami mbe risusuparisa omuini
mokuritjaera kovikurya,
novandu ve ndji nyekerera.
11 Ami mba zara otjipiriko,
nowo ve ndji yora.
12 Owo ve ndji hungira momivanda,
nu imba mba ṱomeva wamururu
ve ndji isa po eimburiro ronyekera.
13 Nungwari ami me kumbu kove, Muhona,
moruveze rwotjari tjoye.
Ndji zuvira morusuvero rwoye orunene,
Ndjambi, orondu ove u yenenisa omakwizikiro
woye wokutja mo yama.
14 Ndji yama kutja e ha ṱomwine motjitombo;
ndji yama kovanavita na ami na momeva omakoto.
15 Omupupo au ya ko kombanda yandje,
nomeva wawo omakoto aye ndji ṋiṋa,
nondjombo ai ndji setike ko.
16 Ndji zuvira, Muhona, mouwa
worusuvero rwoye orukarerere;
nu tara ku ami otja kounyaṋutima woye ounene!
17 O horeke ko omurungu woye komukarere woye,
orondu ami mbi ri mombamisiro;
hakahana okundjizuvira.
18 Indjo popezu na ami u ndji yame;
ndji yeura kovanavita na ami.
19 Ove mo tjiwa omayambururiro
nohoṋi nomanyekererero wandje;
ovendjitatumise avehe ve ri komurungu woye.
20 Omanyekererero ya nyainya omutima wandje,
nami otji mbe rihahiza;
ami mba undja kutja pe nomundu
ngu me ndji ṱire ondjenda,
nungwari kapa ri umwe;
nokutja pena ngu me ndji huhumiṋa,
nungwari hi mwine nangarire umwe.
21 Tji mba ṱondjara, owo ve ndji pa ouanga;
nu tji mba ṱonyota,
ve ndji pa omeva omayake.
22 Omikandi vyawo ngavi rire ondjandero yawo,
nomariro wawo omazere ngaye rire omawiro wawo.
23 Poṱuparisa omeho wawo, kutja ave ha munu,
nu ngundiparisa omatambo wawo aruhe.
24 Ve pindikira nu u ve vere momazenge woye;
nomayakero womazenge woye ngaye ve sesete.
25 Ozondanda zawo ngaze rire omatundu;
nomaturiro wawo ngaye sewe tjo.
26 Orondu owo ve tatumisa ingwi ove ngu wa vera,
nu ve serekarera omihihamo
vyaimba mbu wa tanda.
27 Ṱiza ouvi wawo auhe;
nu ove tjiti kutja ve mune ondjamo yoye.
28 Omana wawo ngaye zemisiwe
membo rovanamuinyo;
nu ave tjangwa ko puna ovasemba.
29 Nungwari ami mba ningisa
ondjenda nu mba hihamwa;
ndji yera, Ndjambi, nu u ndji yame!
30 Ami me tanga Ndjambi neimburiro;
me hivirike ounene we ame mu tjere okuhepa.
31 Ihi matji yandja onyuṋe ku Muhona,
komeho yokumupunguhira ondwezu
yongombe ndje kura.
32 Ovaṋiṋikiziwa tji mave munu otjiṋa hi,
mave yoroka;
nu imba mbe rikotamena ku Ndjambi,
mave yanḓiparisiwa.
33 Orondu Muhona u puratena
ku imba mbe nouhepe,
nu ka zembi imba mbe ri motjovakamburwa.
34 Eyuru nehi ngavi tange Ndjambi,
nomevakokuvare wina na atjihe tji
tji nyinganyinga mu wo.
35 Orondu Ndjambi ma yama Jerusalem
na tungurura ovihuro vya Juda.
Otjiwaṋa tje matji tura mu vyo
natji kambura ehi ri rire ouini watjo;
36 nozondekurona zovakarere ve maze rumata ro,
nu imba mba suvera ena re,
mave tura mu ro.
© Herero Revision Bible © Bible Society in Namibia, 2021.
