Ongumbiro yondjamo
Komuimburise wotjiketara. Epsalme ra David.
1 Zuvira ondjuriro yandje, Ndjambi,
nu yakura ongumbiro yandje!
2 Okuza komaandero wouye ami
me ku kove moungundipare
womutima wandje.
Ndji rondisa ketjo ere tjinene,
ndi hi nokuvazewa i ami.
3 Tjiri, oove omaundiro wandje,
noove otjiretundu otjizeu tji tji ndji
yama kovanavita na ami.
4 Ami me vanga okusekira mondanda
yoye ondjapuke aruhe nga aruhe;
me paha omaundiro kehi yovivava vyoye.
5 Orondu ove, Ndjambi,
wa zuva omakwizikiro wandje;
we ndji pa otjirumatwa
tjaimba mbe yozika ena roye.
6 Weza ko omayuva omengi komuinyo wombara,
nozombura zayo ngaze kare orure,
okuza komuhoko nga komuhoko.
7 Oyo ngai honapare aruhe nga
aruhe komurungu woye, Ndjambi.
Yama yo notjari nouṱakame woye.
8 Notji me imburire ena roye nga aruhe,
ame yenenisa omakwizikiro
wandje eyuva arihe.
© Herero Revision Bible © Bible Society in Namibia, 2021.
