Omapsalme 57 - Herero Revision Bible (HRR)

Ongumbiro yombatero

Komuimburise otja kombosiro yOkuhina Okuṱukuṱura. Epsalme ra David, eye tja za nokutaura ku Saul na kaṱara mondimba.

1 Ndji tjariparera, Ndjambi, ndji tjariparera,

orondu ami me paha omaundiro move.

Momuzire wovivava vyoye ami

omu mba muna ondjamo,

nga oumba tji wa kapita.

2 Me ku ku Ndjambi wOkombandambanda,

ku Ndjambi ngu ndjipa ovihepwa vyandje.

3 Eye me ndji hindire ombatero okuza meyuru,

nu ma havere imba mbe ndji ṋiṋikiza.

Ndjambi me ndji raisire orusuvero

rwe orukarerere nouṱakame we.

4 Ami mba koverwa i ovanavita

mbe ri otja ozongeyama nḓe rya ovandu.

Omayo wawo ye ri otja omanga noviku,

omaraka wawo ye ri otja omangaruvyo omatwe.

5 Raisa ounene woye meyuru, Ndjambi,

nomasa woye kombanda yehi arihe!

6 Ovanavita na ami ve ndji yarera

ombate okundjikambura,

nomuinyo wandje wa yumana tjinene.

Va sa otjitoto mondjira yandje,

nungwari va wira mo oveni.

7 Omutima wandje we riyameke kove, Ndjambi;

ami me imbura nokukutanga.

8 Penduka, muinyo wandje!

Pendukeye, ngoma notjiharpe tjandje!

Ami me penduka ngunda eyuva ari hiya pita.

9 Muhona, ami me ku tanga mokati koviwaṋa,

nu me ku imburire mokati komihoko.

10 Orusuvero rwoye orukarerere

rwa vaza nga komayuru,

nouṱakame woye wa kaṱuna kevaverwa.

11 Raisa ounene woye meyuru, Ndjambi,

nouṱakame woye kombanda yehi arihe.