Ongumbiro yondjesiro yozondjo
Komuimburise. Epsalme ra David, omuprofete Natan tja hungira kuna David indu eye tja za nokukatuka orukupo puna Batseba.
1 Ndji tjariparera otja korusuvero
na kouwa woye, Ndjambi;
notja kotjari tjoye otjinene
zemisa ozongatukiro zandje.
2 Ndji koha kouvi wandje auhe,
nu u ndji kohorore kourunde wandje.
3 Orondu ozongatukiro zandje mbi ze i,
nourunde wandje aruhe u ri komurungu wandje.
4 Kove, nu kove erike ami oku mba tura ondjo,
ne tjiti ouvi momeho woye.
Okutja otji u nousemba
okundjipangura nokundjipa ondjo.
5 Ami owami omunauvi okuza kongwatero yandje,
nu mama we ndji yakana mouvi.
6 Ove u suvera ouatjiri womutima omusemba,
nu mohamunika ove u ndji honga ounongo.
7 Isa ko ouvi wandje, nami me rire omukohoke;
ndji koha, nami me rire omuvapa twee.
8 Ndji zuvisa ombosiro yondjoroka noyenyando,
nu nandarire kutja ove wa ṱukuṱura omaṱupa wandje,
me kara nondjoroka rukwao.
9 Horeka omurungu woye komauvi wandje,
nu zemisa ondjo yozongatukiro zandje azehe.
10 Mema omutima omukohoke mu ami, Ndjambi,
nu u zikamise ombepo ombe
nonḓikame moukoto wandje.
11 O ndji nakaura komurungu woye,
nu o ndji yeka Ombepo yoye Ondjapuke.
12 Ndji nyandisa rukwao mokundjipa ombatero yoye,
nu u ndji pe ombango yokukara nonḓuviro kove,
13 kutja mbi honge ovanauvi ozondjira zoye,
nowo ve ritanaurire kove.
14 Yama omuinyo wandje konḓiro, Ndjambi,
nami otji me zuvarisa nondjoroka ousemba woye.
15 Muhona, paturura omiṋa vyandje
kutja mbi sore okuzuvarisa ondangero yoye!
16 Andakuzu u nonyuṋe mozombunguhiro zovinamuinyo,
etje ku pa zo;
ozombunguhiro ozoningiririsiwa koze vanga ko.
17 Ombunguhiro yandje oyo ombepo
ndje risusuparisa, Ndjambi;
nove ko nakunakaura ko omutima
mbwe risusuparisa nu mbwa nyaika.
18 Ndjambi, ingoneka Sion otja kotjari tjoye,
nu u tungurure orumbo rwa Jerusalem!
19 Ove mo kara norutjato mozombunguhiro zousemba,
na mu inḓa ozoningiririsiwa zetu wina;
nozondwezu zozongombe otji maze punguhirwa
kotjipunguhiro tjoye.
© Herero Revision Bible © Bible Society in Namibia, 2021.
