Ongumbiro yondjamo
Komuimburise nozohiva. Epsalme ra David.
1 Muhona, puratena kongumbiro yandje,
nu u zuve ondjemeno yandje.
2 Puratena kondjuriro yandje yombatero,
Mbara yandje na Ndjambi wandje.
Ami me kumbu kove Muhona.
3 Muhona, ove omuhuka
omunene u zuva eraka randje;
tji pa tji, ami e ku ṱunine ombunguhiro,
ne undju eziriro kove.
4 Orondu kaove Ndjambi ngu u norutjato mouvi;
nu koyandjere omunauvi moukarepo woye.
5 Imba mbe rihiva oveni
kamaave munika komurungu woye;
nove wa tonda imba avehe mbe tjita ouvi.
6 Ove u yandeka ovanavizeze avehe,
nu u nyengwa ovatjite voutwe ovawovise.
7 Nungwari mena rorusuvero rwoye orunene
ami me yenene okuhita mondjuwo yoye
nokurikotamenena mondjuwo yoye ondjapuke
nokurikota komurungu woye nondira kove.
8 Muhona, ami mbi novanavita ovengi tjinene!
Ndji hongorera mokutjita ombango yoye,
nu u ndji serurire ondjira yoye mbi kayende mo.
9 Ovanavita na ami kave hungire ouatjiri;
omitima vyawo vi zera okuyandeka porwako.
Omambo wawo omanavineya nomapope,
nu ye ura notjavivi.
10 Ve pangura nu u ve vere, Ndjambi!
Ngave yandekwe i omeripura
wovineya vyawo oveni.
Ve ramba moukarepo woye mena
romaurunde wawo omengi,
nu tjinga ave ku pirukira.
11 Nungwari avehe mbe
nomaundiro move, ngave yoroke,
aruhe nga ve imbure nondjoroka.
Yama avehe mbe ku suvera
kokutja mena roye ve kare nondjoroka move.
12 Ove, Muhona, u sera ondaya
ku imba mbe nonḓuviro kove;
ondjingonekero yoye i ve tjizikiza otja oruvao.
© Herero Revision Bible © Bible Society in Namibia, 2021.
