Sion Otjihuro tja Ndjambi
Eimburiro. Epsalme rovazandu va Kora.
1 Muhona eye omunene,
nu wa sokutangwa motjihuro
tja Ndjambi wetu, kondundu ye ondjapuke.
2 Sion, ondundu ya Ndjambi,
ya tongama nu ombwa omanise;
otjihuro hi tjombara onene tji yorokisa ouye auhe.
3 Ndjambi we ritjiukisa mozondjuwo zatjo zouhona,
kutja eye otjiṱunga otjinamasa.
4 Tareye, ozombara za woronganene
okuyekurwisa ondundu Sion.
5 Nungwari tji ze i munu, arire tji za kumwa,
aze uruma naze hakahana okutupuka.
6 Ozo za kamburwa i omazezerero
nomburuma poṋa mbo,
tjimuna omukazendu pombandukiro,
7 tjimuna otjipukupuku tjokomuhuka
tji matji teya ozondjuwozomomeva za Tarsis.
8 Otja pu twa zuva, opu twa munu
oviungura vya Muhona
motjihuro tja Ndjambi wetu,
ingwi Muhona Omunamasaaehe.
Ndjambi me tji zikamisa aruhe nga aruhe.
9 Ndjambi, eṱe tu zemburuka otjari
tjoye mondjuwo yoye,
nu tu rizemburuka norusuvero rwoye orukarerere.
10 Ove u tangwa i ovandu ngamwa akuhe,
nondangu yoye ya tandavara kombanda yehi arihe.
Ove u honapara nousemba.
11 Ondundu Sion ngai nyande,
novihuro vya Juda ngavi yorokere
ozombanguriro zoye ozosemba.
12 Tjiwaṋa tja Ndjambi, kondorokeye Sion,
nu vareye otuhungu twayo;
13 tareye korumbo rwayo,
nu mu konḓonone oviṱunga vyayo
kutja mu kaserekarere nai kozondekurona zeṋu:
14 “Ndjambi ngwi eye
oNdjambi wetu aruhe nga aruhe;
eye me tu hongorere moruveze aruhe ndu maru ya.”
© Herero Revision Bible © Bible Society in Namibia, 2021.
