Ongumbiro yomuvere
Komuimburise. Epsalme ra David.
1 Ovaṋingandu imba mbe rikendera
omusyona nomuhepe;
Muhona meve vatere tji ve ri moumba.
2 Muhona meve yama nu meve hupisa,
meve ṋingaparisa kombanda yehi;
neye ke nokuveyandja mouvara wovanavita na wo.
3 Muhona meve vatere tji va vere,
nu meve verukisa.
4 Ami mba tja: “Muhona, ami mba
tura ondjo komurungu woye,
ndji tjariparera, nu u ndji verukise.”
5 Ovanavita na ami ve ndji hungira navi ave tja:
“Eye hapo ma koka ruṋe,
nena re mari zengi ruṋe?”
6 Imba mbe ya okundjivarura ve hungira ovineya;
ve ya okundjiwongera ozombuze ozombi,
nu tjazumba ave kezerimba movandu akuhe.
7 Avehe mbe ndji tonda ve ndji hokora,
nu ve rizemburuka okutjita ouvi ku ami.
8 Owo ve tja nai: “Tara, eye wa vera navi tjinene;
kamaa penduka rukwao.”
9 Nandarire epanga randje tjinene ku mbe riyameka,
nu nguyatu ri pamwe
nambano we ndji sekamena.
10 Nungwari ove, Muhona,
ndji tjariparera, nu u ndji verukise,
nami me sutisa ovanavita na ami.
11 Owo kave nokuyorokera ami,
notji me tjiwa kutja ove u nonyuṋe mu ami.
12 Ove, tjiri, mo ndji vatere,
ami tjinga ambi tjita ousemba;
mo ndji kareke mekoro roye nga aruhe.
13 Nga tangwe Muhona, Ndjambi wa Israel,
eye nga tangwe aruhe nga aruhe! Amen! Amen!
© Herero Revision Bible © Bible Society in Namibia, 2021.
