Ondangero youwa wa Ndjambi
Epsalme ra David, tje ritjita otja ngwa tanauka otjiuru komurungu wa Abimelek, kokutja me mu rambe.
1 Ami me tanga Muhona omayuva aehe;
aruhe ondangero ye ngai kare motjinyo tjandje.
2 Ami me rihivire ondangu ya Muhona;
avehe mbe tatumisiwa ngave puratene nu ngave yoroke!
3 Ngatu imbure pamwe ounene wa Muhona,
ngatu tange pamwe ena re!
4 Ami mba kumba ku Muhona, neye we ndji zuvira,
eye we ndji yama kozondiriro zandje azehe.
5 Imba mbe tatumisiwa, ve tara ku ye nave yoroka;
nowo kamaave ṱisiwa ko ohoṋi.
6 Omusyona wa ku ku Muhona, neye we mu zuvire;
ne mu kutura kozombamisiro ze azehe.
7 Omuengeri wa Muhona u
tjevera imba mbe nondira ku ye,
nu u ve isa mo moumba.
8 Roreye nu mu rimunine ouwa wa Muhona;
omuṋingandu omundu ngu paha omaundiro mu ye.
9 Kareye nondira ku Muhona,
oweṋe amuhe mbu mu ri otjiwaṋa tje;
imba mbe nondira ku ye, kave na tji mave hepa.
10 Nangarire ozongeyama ze ṱondjara naze yaraara,
nungwari imba mbe nonḓuviro
ku Muhona kave na tji mave hepa.
11 Vanatje, indjeye mu puratene ku ami;
ami me mu hongo okukara nondira ku Muhona.
12 Hapo u nonḓero yokuhupa omuinyo orure
kutja a munine po ouwa nondjoroka?
13 Punao, tjaera eraka roye kokuhungira ouvi
nomiṋa vyoye komambo wovizeze.
14 Humburuka kokure nouvi nu u tjite ouwa;
paha ohange nu u teze yo nomutima woye auhe.
15 Muhona u tara kovasemba,
nu u puratena kondjuriro yawo;
16 nungwari eye u pirukira ovatjite vouvi,
nu u tjita kutja ave ha roro
okuzemburukwa kombanda yehi.
17 Ovasemba tji mave ku ku Muhona,
eye u ve zuvira,
nu u ve vatera momauzeu wawo aehe.
18 Muhona u ri popezu na imba
womitima mbya nyaika,
nu u yama imba mbe rihahiza.
19 Omusemba nanda munu oviwonga ovingi,
Muhona me mu vatere mu vyo avihe;
20 Eye u ṱakamisa oviṋepo
avihe vyorutu rwomusemba,
nu kape neṱupa re rimwe ndi mari teyewa.
21 Ouvi mau zepa omunauvi;
nu imba mba tonda ovasemba mave verwa.
22 Muhona ma kutura imba mbe mu karera;
imba mbe unda mu ye kamaave pewa ko ondjo.
© Herero Revision Bible © Bible Society in Namibia, 2021.
