Omerihepuriro wouvi nondjesiro
Epsalme ra David.
1 Ovaṋingandu imba mbe havererwa ozongatukiro zawo
nu mbe isirwa omauvi wawo.
2 Omuṋingandu omundu Muhona
ngwe he mu varere ouvi we,
nu ngu hi novineya momutima.
3 Tji mba mwina okurihepura omauvi wandje,
orutu rwandje rwa pungarisiwa i
okurira kwandje eyuva arihe.
4 Muhona, eke roye re ndji
ṋiṋikiza omutenya nouṱuku;
omasa wandje ya pwira
tjimuna otjeme moupyu wokuṋi.
5 Ami mbe rihepura ourunde wandje kove,
nu hi vandekere ozondataiziro zandje.
Mba tja: “Me rihepura ozongatukiro
zandje ku Muhona!”
NOve we ndji isira ourunde wandje auhe.
6 Imba mbe ku kongorera nouṱakame nga
ve kumbe moruveze rwombamisiro.
Wina omipupo ominene
vyoumba tji vya sekama,
kavi nokuṱuna ku ye.
7 Oove omaundiro wandje,
mo ndji yama komauzeu,
nu mo ndji imburisa omaimburiro wongutukiro,
motjimbe tjokutja ove u ndji tjevera.
8 Muhona ma tja nai:
“Ami me ku hongo nu me ku urikire ondjira,
ndji wa sokutwara;
me ku rongo, neho randje
mari kara kombanda yoye.
9 O kara otja okakambe poo otja
okasinokambe ku ke hi nozondunge,
nu ku ke tuwa mo otjitumbure tjotjitenda motjinyo
okuketjaera nokuketumbura.”
10 Omunauvi u nomihihamo omingi,
nungwari ingwi ngu me riyameke ku Muhona
ma yamwa i otjari tje otji karerere.
11 Nyandeye mu Muhona nu
mu yoroke, oweṋe vasemba!
Imbureye nenyando,
oweṋe amuhe mbu mu nonḓuviro ku ye!
© Herero Revision Bible © Bible Society in Namibia, 2021.
