Ongumbiro yokuhongorerwa nokuyamwa
Epsalme ra David.
1 Kove, Muhona, oku me
kumbu ongumbiro yandje;
2 Ndjambi wandje, ami me riyameke kove.
O ndji tarere ame ṱisiwa ohoṋi;
novanavita na ami ave ha nyandere
imbi mbi mavi tjitwa ku ami.
3 Imba mbe undja kove kamaave ṱisiwa ohoṋi,
imba mbe he riyameke kove
ombu mave ṱisiwa ohoṋi.
4 Ndji honga ozondjira zoye Muhona,
ndji honga omirari vyoye.
5 Ndji honga okuhupa mouatjiri woye,
orondu oove ngu u ri Ndjambi omuyame wandje;
nami aruhe me twa omaundjiro wandje move.
6 Muhona, zemburuka ouwa
womutima norusuvero rwoye,
orondu ovyo vya kara ko okuza ko nga aruhe.
7 O zemburuka ourunde
nozongatukiro zoumutanda wandje;
nungwari morusuvero na mouwa woye,
ndji zemburuka, Muhona!
8 Muhona eye omuwa nomusemba;
eye opu ma zu okuhonga ovanauvi
ondjira ndji ve sokutwara.
9 Eye ma hongorere overisusuparise mondjira osemba,
nu meve hongo ombango ye.
10 Nouṱakame na morusuvero,
eye ma hongorere
avehe mba mbe ṱakamisa omerikutiropamwe
naimba mbe nonḓuviro komatwako we.
11 Mena roye, Muhona, ndji isira omauvi wandje,
owo tjinga aye ri omengi tjinene.
12 Omundu ngu nondira ku Muhona,
ma hongwa i ye indji ondjira ndji ma sokutwara.
13 Eye aruhe ma ṋingapara,
nozondekurona ze maze rumata ehi.
14 Muhona epanga na imba mbe nondira ku ye,
nu u ve tjivisa omerikutiropamwe we.
15 Omeho wandje ye panḓera pu Muhona,
tjinga eri ombatero yandje aruhe,
eye me ndji yama koumba.
16 Tara ku ami, Muhona, nu ndji tjariparera,
orondu tjinga ambi ri erike notjingundi.
17 Ndji kutura kombamisiro yandje,
nu ndji yama komaumba wandje aehe.
18 Tara kondjenda na kombamisiro yandje,
nu u ndji isire ourunde wandje aehe.
19 Tara, ovanavita na ami, tjiri, ovengi;
owo, tjiri, ve ndji nyengwa tjinene.
20 Ndji tjevera nu ndji yama;
o ndji tarere ame ṱisiwa ohoṋi,
orondu ove tjinga au ri omaundiro wandje.
21 Ousemba noupore ngau ndji yame,
tjinga amba twa omaundjiro wandje move.
22 Ndjambi, kutura otjiwaṋa tja Israel
kozombamisiro zatjo azehe.
© Herero Revision Bible © Bible Society in Namibia, 2021.
