Ongumbiro youtoṋi
Komuimburise. Epsalme ra David.
1 Muhona, ombara mai
nyandere omasa ngu we i pa,
nu mai yorokere ondoṋeno ndji we i pa.
2 Ove wa yenenisa onḓero yomutima wayo,
nu ko ruruparere ko omaningiriro wayo.
3 Ove we i tjakanena nozondaya nouṋingandu,
nu kotjiuru tjayo o twako ekori rouhona rongoldo.
4 Oyo ya ningira omuinyo kove,
nove we i pa omuinyo omure nomukarerere.
5 Ondangu yayo onene mena rombatero yoye,
ove wa yandja ounene nondjozokiro kombara.
6 Ove we i sera ondaya nga aruhe,
we i pa enyando enene momurungu woye.
7 Ombara ye riyameka ku
Muhona Omunamasaaehe;
nu mena rorusuvero rwa Muhona orukarerere
oyo kai nakuputara ko.
8 Eke roye, Muhona, mari
kambura ovanavita na ove avehe,
eke roye rokunene mari kambura
imba mbe ku tonda.
9 Ove tji we riraisa,
mo ve yandeke tjimuna ezuko romuriro.
Muhona ove mo ve nyono momazenge woye
nu omuriro mau ve seseta.
10 Ove mo yandeke ozondekurona
zawo kombanda yehi,
nu mo kutura ovature vehi ku zo.
11 Tji mave ku pirukire nourizemburuka wourunde,
kave nokuṋingapara.
12 Tji we ve yaha noviku vyoye,
mave taura nave tupuka.
13 Matu tanga omasa woye omanene, Muhona!
Eṱe otji matu imbura nokutanga omasa woye.
© Herero Revision Bible © Bible Society in Namibia, 2021.
