Ounene wa Ndjambi moviutwa vye
Komuimburise. Epsalme ra David.
1 Tjiri, omayuru ye serekarera ounene wa Ndjambi,
nevaverwa ri hongonona oviungura vyomake we.
2 Eyuva rimwe ri tjivisa ombuze ndji kekwao,
nouṱuku umwe au i raere koukwao.
3 Kamu neraka, kamu nomambo,
nu kamu nombosiro ndji mai zuvaka;
4 nungwari ombosiro yombuze
ndji i zuvaka mouye auhe,
i zuvaka nga komaandero wehi.
Ndjambi wa ungurira eyuva oruuto mevaverwa;
5 oro ri pita omuhuka omunene tjimuna
omuvareke tjinga e pita metuwo re romara,
nu tjimuna omutupuke tji ma
tupuka otjikara tjozombata.
6 Oro ri pita kotjikoro tjimwe
tjevaverwa nari kahita kotjikoro otjikwao tjarwe.
Nu kape notjiṋa tji tji kaera oupyu waro.
Omatwako wa Muhona
7 Omatwako wa Muhona ya yenena mu avihe:
Ye yandja omasa omape;
omahongero wa Muhona owo ouatjiri,
ye yandja ounongo ku imba mbe hi na wo.
8 Omaraerero wa Muhona owo omasemba,
imba mbe nonḓuviro kuwo mave kara nenyando.
Omatwako wa Muhona omakohoke
ye yandja ozondunge.
9 Okurikotamena ku Muhona okokuwa,
oko maku karerere nga aruhe.
Ozombanguriro za Muhona ozosemba,
aruhe ze nouatjiri.
10 Ozo ozonanḓengu tjinene pongoldo ongohoke;
ozo omuzeze pouitji wozonyutji.
11 Nu wina mu zo omukarere woye omu ma rongwa;
nu mokuzeṱakamisa omu mu nondjambi onene.
12 Ngu muna ozondataiziro ze omuini owaṋi?
Ndji kutura, Muhona,
ku inḓa ami nḓu mbi ha munu!
13 Tjaera omukarere woye kouvi wa wina;
au honapara mu ami.
Otji me rire omukohoke
ne kuturwa kouvi wourunde.
14 Omambo nomeripura wandje
ngaye yakurwe i ove, Muhona,
ngu u ri omaundiro nomukuture wandje.
© Herero Revision Bible © Bible Society in Namibia, 2021.
