Okutanga Ndjambi Omunamasaaehe
1 Tangeye Muhona!
Okokuwa okuimburira Ndjambi
wetu ondangero;
okumutanga oko enyando nonyuṋe.
2 Muhona ongu ma tungurura
Jerusalem, nongu ma kotora
Ovaisrael ovahuurwa.
3 Eye u verukisa imba mbe
nomitima mbya ṱukuṱuka,
nu u kuta ovirwaro vyawo.
4 Eye wa twapo otjivaro tjozonyose,
nu u isana aihe kena.
5 Muhona wetu eye
omunene nomunamasa,
ounongo we kau varwa.
6 Eye u yeura overisusuparise,
na kundu ovanauvi pehi.
7 Imburireye Muhona eimburiro
rondangero, imburireye Ndjambi
wetu amamu nyanda otjiharpe.
8 Eye u kutjira evaverwa novikamba;
u rokisa ombura kombanda yehi,
nu u nyomona ehozu kozondundu.
9 Eye u yandja omaryo kovinamuinyo,
nu u parura omakwarona tji maye pose.
10 Eye ke nonyuṋe moukambe ounamasa,
poo movarwe wovita omapenda;
11 nungwari eye u nonyuṋe mu
imba mbe mu karera,
na imba mbe undja
korusuvero rwe orukarerere.
12 Jerusalem, tanga Muhona;
Sion, hivirika Ndjambi woye!
13 Eye wa ungura ovipate vyomivero
vyoye okurira ovinamasa, nu wa
sera imba mba tura move ondaya.
14 Wa eta ohange mehi roye,
nu we ku kutisa novikokotwa
imbi oviwaviwa.
15 Eye tji ma yandja omarakiza kehi,
owo ye yenenisiwa tjimanga.
16 Eye u vandeka ehi novitutukende,
nu u rimba omakende womueme
tjimuna omutwe.
17 U rokisa ozombawe zombura;
owaṋi ngu ma sora okuzara
ombepera eye ndji ma hindi.
18 Eye tja rakiza, avihe mbi tjandje vya zuzuka;
nu tja hindi ombepo, omeva ye pupa.
19 Eye u tjivisa embo re kotjiwaṋa tje,
nomaraerero nomazikamisiro we ku Israel.
20 Eye keya tjitira otjiwaṋa tjarwe ngamwa otjiṋa hi;
ovyo kavi nokutjiwa omatwako we.
Tangeye Muhona!
© Herero Revision Bible © Bible Society in Namibia, 2021.
