Ongumbiro yongurova
Epsalme ra David.
1 Ami me ku kove, Muhona;
hakahana okundjivatera!
Arikana, ndji zuvira, tji me ku kove.
2 Yakura ongumbiro yandje otja
ombunguhiro yomoro omuwa,
nomayerero womake wandje otja
ombunguhiro yongurova.
3 Muhona, twa po ondjeverero
potjinyo tjandje;
tjevera omambo aehe ngu me hungire.
4 Ndji tjaera komeripura wokuvanga
okutjita ouvi nokutja e ha kara
nehore novanauvi,
nokutja e ha ri ovikurya vyawo ovitjate.
5 Omundu omusemba ma sora
okundjitona nokundjivyura morusuvero,
nungwari ami himee yakura ondjiririsa yovanauvi,
orondu aruhe mbi kumba kutja
ouvi wawo au ha toṋa.
6 Ovanane vawo tji mave undurirwa
pehi okuza ketjo,
ovandu vawo otji mave yakura kutja
omambo wa Muhona ouatjiri.
7 Otja ehi romakunino punga ari ura
novitumbehi omutaure tja zu nokutaura ro,
omaṱupa wawo opunga amaye
rimbara potjinyo tjeyendo.
8 Nungwari ami me kara pokuriyameka kove,
Muhona, Ndjambi wandje.
Me paha omaundiro move;
o ndji esa kutja mbi koke!
9 Ndji tjevera kozombate nḓu ve
ndji twira po na kozongwehe
zaimba mbe tjita ouvi.
10 Ovanauvi ve esa ve wire
mozombate zawo oveni,
ami ngunda ame kapita nokuhinooma.
© Herero Revision Bible © Bible Society in Namibia, 2021.
