Ndjambi u tjiwa avihe
Komuimburise. Epsalme ra David.
1 Muhona, ove we ndji
konḓonona nu we ndji tjiwa.
2 Ove u tjiwa ohaameno nosekameno yandje;
u tjiwa ourizemburuka wandje,
ngunda ambi hiye ripura na wo.
3 U muna okuungura nokusuva kwandje,
u tjiwa ovitjitwa vyandje avihe.
4 Andarire ngunda ambi
hiya nyamukura, Muhona,
ove tjandje wa tjiwa rukuru mbi me vanga okuhungira.
5 Ove we ndji kondoroka ominda avihe,
nu we ndji isa po owoye.
6 Okundjitjiwa kwoye kwe ndji
himisa tjinene,
oko kwa kapita ondjiviro yandje.
7 Me henene ku tjiṋe okuza po pove,
me taurire ku tjiṋe kutja o he ndji munu?
8 Nande rondo keyuru ove tjandje oku u ri;
nande kaṱara motjovakoke
ove tjandje omu u ri wina.
9 Nande tuka okuyenda komuhuka,
poo nande katura kokure
komukuma wokongurova,
10 wina ove mo kendjivaza koṋa ngo,
neke roye rokunene mari ndji ṱiza.
11 Nande hungire konḓorera kutja i ndji undike,
poo kondjerera ndje ndji
kondoroka kutja i rire ouṱuku,
12 onḓorera kove oyo kanḓorera,
nouṱuku u yera tjimuna omutenya,
onḓorera kove i ri otja ondjerera.
13 Ove we ndji uta nouṋepo wandje auhe,
no u twa kumwe mezumo ra mama.
14 Ami me ku tanga, tjinga awe ndji
uta komuhingo omukumise.
Oviungura vyoye avihe ovyo ovihimise ku ami.
Ihi me tji tjiwa nawa tjinene.
15 Kape neṱupa randje nu ra horekwa kove,
indu tji mba zezengwa mongumumu,
nouṋepo wandje tji wa tuwa
kumwe mezumo ra mama.
16 Ove tji we ndji muna tjandje hiya kwatwa;
omayuva aehe womuinyo
wandje ya tjangwa membo roye,
owo ngunda aye hiya utwa.
17 Omeripura woye, Ndjambi, tjiri,
owo omahimise ku ami; owo,
tjiri, omengi tjinene okuvarwa!
18 Ami andakuzu mbe ye vara,
atja ye rira omengi peheke.
Tji mba penduka,
ove tjandje ingee u ri pu ami.
19 Andakuzu ove, Ndjambi,
mo yandeke ovanauvi!
Andakuzu ovatjite voutwe mave
humburuka kokure na ami!
20 Owo ve hungirira ove oviṋa vyourunde;
nu ve yamburura ena roye.
21 Hi tondere are imba mbe ku tonda Muhona;
nu hi nyengerwe are
imba mbe ku pirukira?
22 Ami mbi ve nyengwa
nonyengo onene tjinene,
nu mbi ve vara otja ovanavita na ami.
23 Ndji konḓonona, Ndjambi, nu u
tjiwe omutima wandje; ndji rora,
nu u tjiwe omeripura wandje!
24 Ndji tjevera kutja e ha twara ondjira yoposyo,
nu ndji hongorera mondjira,
ndji karerera nga aruhe.
© Herero Revision Bible © Bible Society in Namibia, 2021.
