Ondjuriro yOvaisrael mouhuura
1 Pozonḓonḓu za Babilon opu twa kara pehi;
imbo opu twa ririra tjiyatu zemburuka Sion.
2 Komipanda mbya ri meṋe yazo,
okutwa turika ko oviharpe vyetu.
3 Imba mbe tu huurire va tjere
ngatu ve imburire eimburiro;
imba mbaa ve tu tatumisa va vanga
kutja tu ve yorokise, nave tja:
“Tu imburireye eimburiro ra Sion!”
4 Matu sora vi okuimbura eimburiro
ra Muhona mehi rozonganda?
5 Indu tji mbe ku zembi, Jerusalem,
eke randje rokunene ngari remane!
6 Eraka randje ngari kakatere koruramwe,
tji mbi he ku zemburukire,
na tji mbi he ripurire na ove, Jerusalem,
ngu u ri enyando randje enene tjinene.
7 Muhona, zemburuka imbi
Ovaedom mbi va tjita meyuva
ndi Jerusalem ndi tja huurwa,
tji va kara pokuravaera amave tja:
“Haṋeye, haṋeye otjihuro nga
komazikameno watjo!”
8 Babilon, ove, tjiri, mo haṋewa!
Omuṋingandu omundu ngu me ku
sutisire imbi ove mbi wa tjita ku eṱe.
9 Omuṋingandu ingwi ngu ma
hakana ounatje woye ne u tete koruuwa.
© Herero Revision Bible © Bible Society in Namibia, 2021.
