Omaunaunino womundu ngu ri moumba
Komuimburise. Epsalme ra David.
1 Ndjambi, oove ngu mbi tanga aruhe, o mwina ko!
2 Ovanauvi novanavizeze ve ndji kuminina.
Owo ve ndji hongononena ovizeze,
3 ve ndji sekamena kominda avihe
nomambo wonyengo,
nu ve ndji rwisa omukona.
4 Nandarire kutja ami mbe ve suvera,
owo ve yaruka mu ami,
nungwari ami mbi panḓera pokuvekumbira.
5 Owo ve yarurira ami ouvi mouwa,
nonyengo morusuvero.
6 Nowo ve tja: “Zika omunauvi kutja a rire omupangure we,
nu yandjera kutja omunavita na ye
umwe e mu kuminine;
7 tji ma pangurwa nu nga munike omunandjo,
nandarire ongumbiro ye ngai
varwe otja ondjito youvi!
8 Omayuva womuinyo we ngaye rire omasupi,
nu moviungura vye ngamu
pingene omundu warwe!
9 Ovanatje ve ngave rire ozosewa,
nomukazendu we nga rire omuhepundu!
10 Ovanatje ve ngave ryange
otja ovaningire vovikurya,
nu ve vi pahe momatundu wozondjuwo zawo.
11 Ingwi omupahe wozondjo nga
kambure ouini womundu ngwi,
ovozonganda ngave huure oviṋa
eye mbya muna mongondjero ye.
12 Ape ningi omundu ngu
ma ṱondjenda na ye,
nu ape kara omundu ngu
ma ṱotjari nozosewa ze.
13 Ozondekurona ze ngaze yandekwe,
nena re ngari zemisiwe
mozondekurona zokombunda.
14 Muhona nga zemburuke ourunde
wooihe mukururume,
nomauvi waina aye ha isirwa ko.
15 Muhona aruhe nga zemburuke
omauvi wawo,
nungwari omana wooihe mukururume
na indi raina ngaye zembwe oparukaze!
16 Orondu omundu ngo ke na pe
rizemburukire nokuṱotjari;
eye wa tatumisa na zepa omusyona
nomuhepe nomunandjenda.
17 Eye wa suvera okusenga;
osengiro ngai ye kombanda ye!
Eye wa tonda okusera ondaya;
ape ningi umwe ngu me mu sere ondaya!
18 Okusenga ovandu ku ye ku ri
otja okuzara ombanda,
nokunwa omeva
nokuvava omaze morutu rwe.
19 Osengiro ye ngai mu kutjire
tjimuna ombanda ndja zara,
nekwamo nde rikuta na ro aruhe!”
20 Muhona nga yarure oviṋa mbi
avihe kombanda yovanavita na ami,
kombanda yaimba mbe hungirira
ami oviṋa ovivi otja imbi.
21 Nungwari Muhona, Ndjambi wandje,
ndji vatera otja pu wa kwizika,
nu ndji yama mena rouwa
worusuvero rwoye.
22 Owami omusyona nomunandjenda;
mbi hihamwa mourekoto womutima wandje.
23 Ami mbi ri pokuzenga tjimuna
omuzire womapeta;
mbi hingwa tjimuna ombahu mombepo.
24 Ozongoro zandje za mumukisiwa i
okuritjaera kovikurya,
norutu rwandje rwa pungara,
nu rwa rambuka.
25 Ami mba rira omunyekererwa kovandu;
tji ve ndji munu ve taka oviuru vyawo.
26 Ndji vatera, Muhona,
Ndjambi wandje; ndji yama,
tjinga awe ndji suvera ongarerere.
27 Ovanavita na ami otji mave tjiwa
kutja oove Muhona ngu u ndji yama.
28 Owo nandi ve ndji sengi,
ove mo ndji sere ondaya.
Owo nandi ve ndji kuminine,
mave ṱohoṋi; nami, ngu mbi ri
omukarere woye, me yoroka.
29 Ovanavita na ami ngave ṱisiwe ohoṋi;
ngave hwikikwe nondjambu tjimuna ozombanda.
30 Ami me vanga okuhivirika Muhona
neraka enene, me mu tanga
motjimbumba otjinene tjovandu,
31 orondu eye tje kuramenapo
omusyona ne mu yama ku imba
mbe vanga okumupangura kokuṱa.
© Herero Revision Bible © Bible Society in Namibia, 2021.
