Omiano 7 - Herero Revision Bible (HRR)

1 Zemburuka imbi mbi me hungire, muatje wandje, nu o zembi ko imbi mbi me ku raere. 2 Kara nonḓuviro komambo wandje nove mo hupu orure. Panḓera pomahongero wandje nu u ye ṱakamise otja ombuma yeho roye. 3 Ṱiza omahongero wandje oruveze aruhe; ye tjanga momutima woye. 4 Ounongo ngau kare otja omuṱena kwoye, nondjiviro otja epanga roye ropopezu. 5 Ovyo mavi ku tjaere kovakazendu vovarumendu varwe, na kovakazendu ovanarombe.

Omukazendu omuhakohoke mongarero

6 Otjikando tjimwe ee tarerere moruiho rwondjuwo yandje, 7 notji mba muna ovarumendu ovengi omitanda mbe hi nondjiviro, nungwari mu wo mba muna mo omundu umwe ngu ha ri nozondunge. 8 Eye aa ka wondja meṋe yomuvanda popezu notjikoro pu pa turire omukazendu worive, eye tjandje ma varama nondjuwo yomukazendu ngwi 9 ngurova konḓorera. 10 Omukazendu ngwi otje mu tjakanena, tjandje wa zara otja omukorondu, narire tja tungu ondunge. 11 Eye wa ri omukazendu omuhaori, ngu ha ri nohoṋi, nu aruhe ngwaa ryanga momivanda 12 poo ngwaa undama povikoro, rumwe momivanda, rumwe poruveze romarandero. 13 Narire tja pukata omurumendu ingwi omutanda, e mu hupite ne mu tara osemba nomurungu na tja: 14 “Ami mba punguha ozombunguhiro zandje zokutja okuhepa ndinondi, nu mba sutu omakwizikiro wandje, 15 otji mba piti mbi ku pahe. Mba vanga okukumuna, nu oove ngwi! 16 Ami mba yara ombete yandje novirare ovimbonde vya Engipte. 17 Mbe i tjatja nomira notjizumba tjotjindombo, notjorupapa. 18 Indjo tu rare amatu nyanda orombe, tu yoroke morusuvero atwa pukatasana. 19 Omurumendu wandje ke mo monganda. Eye wa ya mouyenda oure. 20 Wa twaerera ovimariva ovingi, nu ma kotoka kombunda yovivike vivari.” 21 Omukazendu ngwi otje mu rora nouwa we, nomurumendu arire tje riyandja komapopa womukazendu ngwi. 22 Mokamanga omurumendu ngwi we mu kongorera tjimuna onduwombe ndji mai kaṱa, tjimuna ongoṱu ndji mai kawira mongwehe, 23 otjiku mu matji katuvakaṋena omutima wayo. Eye wa ri otja onḓera ndji mai tukire mongwehe ai hi nokutjiwa kutja omuinyo wayo u ri moumba.

24 Nambano, vanatje vandje, purateneye ku ami. Yandja ko ombango komambo wandje. 25 Amu yandjere ko omukazendu ngwa sana ngo kutja a hakane omitima vyeṋu; amu mu kongorere ko. 26 Eye onguri onyoneno yovarumendu ovengi, nu wa zepaisa ovengi tjinene mbe hi notjivaro. 27 Tji mwa i kondjuwo ye, okutja nao mamu i kotjovakoke. Oyo ondji ri ondjira osupi ndji twara konḓiro.