1 Omunauvi u tupuka nangarire kutja kape nomundu ngu me mu ramba; nungwari omusemba ka tira otjiṋa, eye u ri otja ongeyama.
2 Otjiwaṋa tji matji tjiti ouvi, tji kara novanane ovengi; nungwari otjo tji tji nomunane omunazondunge nomunandjiviro, tji rira otjinamasa natji zikama.
3 Omundu omunauvara ngu ṋiṋikiza ovasyona wa sana nombura ndji pupa avihe nai nyono ovikunwa.
4 Imba mbe nyengwa omahongero ve yozika ovarunde; nungwari imba mbe ye ṱakamisa ve ve pirukira.
5 Ovanauvi kave tjiwa kutja ousemba u heya tjike, nungwari imba mbe paha Muhona ve tjiwa avihe.
6 Okokuwa okurira omusyona au ri omuṱakame komeho yokurira omutumbe au he ri omuṱakame.
7 Omuzandu ngu ṱakamisa omahongero eye omunazondunge; nungwari omundu ngu tjita oupanga puna ovandu oviporoporo u yamburura ihe.
8 Ngu takavarisa outumbe we mokuningira ovihohe noviweziwa vyarwe movandu, u wongera ingwi ngu tjariparera ovasyona.
9 Ngu ha ṱakamisa omatwako, ongumbiro ye wina ondjaukise ku Ndjambi.
10 Ngu pukisa ovasemba nokuvetwara kondjira youvi, ma wire motjitoto tje omuini; nungwari ovehinandjo mave rumata ouwa.
11 Omutumbe aruhe u rivara kutja onongo; nungwari omusyona ngu nozondunge u mu konḓonona nawa.
12 Ovasemba tji mave honapara, pe kara ondjoroka onene; nungwari ovanauvi tji mave rire ovahona, ovandu ve ṱara.
13 Ngu ma vandeke ozongatukiro ze ke nokuṋingapara; nungwari ingwi ngu me rihepura zo na poka ku zo, Ndjambi me mu tjariparere.
14 Omuṋingandu omundu ngu nondira ku Muhona aruhe; nungwari ingwi ngu ri otjirangaranga ma wire moumba.
15 Omunauvi ngu honaparera otjiwaṋa otjingundi u ri otja ongeyama ndji mai tye ovimboro, notja ongu ndja ṱondjara.
16 Omunane ngu hi nozondunge u rira omuṋiṋikize otjindandi; nungwari ingwi ngwa tonda ouhasemba ma hupu orure.
17 Omundu ngu nondjo yokuzepa omukwao u tambauka nga konḓiro; ape ningi omundu ngu me mu tjaere.
18 Ngu ryanga nokuhinatjipo ma yamwa; nungwari ngu ryanga mozondjira zoposyo ma wire mu imwe yazo.
19 Omukune ngu ungura ehi re romakunino u kara novingi okurya; nungwari ingwi ngu rambera oviṋa vyomungandjo, aruhe u rira omusyona.
20 Omundu omuṱakame u serwa ondaya onyingi; nungwari ingwi ngu kondja okutumba tjimanga, tjiri, ma verwa.
21 Kakokuwa okutjita ombangu; orondu omundu kombunda ma katjita ouvi mena rokarutau komboroto.
22 Omundu omunaruru u nanukira okutumba hakahana, nungwari ka tjiwa kutja ouhepe mau ya ku ye.
23 Ngu tjurura omukwao korusenina ongu kamuna ondjingonekero komeho yaingwi ngu nokahwaaraka.
24 Ngu panḓera pokuvaka oviṋa vya ihe na ina na tja: “Imbwi kauvi!” eye omukwao nerunga.
25 Omundu ekorokope u hohiza ozombata; nungwari ngwe riyameka ku Muhona u kovisiwa tjinene.
26 Ngu riyameka komeripuriro we omuini eye eyova; nungwari ingwi ngu ryanga mounongo ma yamwa.
27 Ngu yandja komusyona kamaa ka hepa; nungwari ingwi ngu pata omeho we ku ye u sengwa tjinene i ovandu.
28 Ovanauvi tji mave honapara, ovandu ve ṱara; nungwari tji va zu ko kounane, ovasemba mave honapara rukwao.
© Herero Revision Bible © Bible Society in Namibia, 2021.
