1 Otja ombundu mokuṋi poo ombura moruveze rwomakondero punga avi ha kara ko, ondjozikiro opunga ai ha pwirire eyova.
2 Otja onḓera nondiri punga aze tuka, opunga ape zenga osengiro yomukona ndji hi notjiṋa.
3 Okakambe mo tono nongora, nokasino mo tumbura nomuvya, neyova mo tono noruhongwe metambo.
4 O ziri eyova otja kouyova waro kokutja ove omuini o ha sana ku ro.
5 Zira eyova otja kouyova waro kokutja ari he rivara orini otja onongo.
6 Tji mo hindi eyova kutja ri tware ombuze, mo rike ombaze yoye omuini, nu mo riyetere oumba.
7 Otja omarama womuremane punga aya ngundipara, omuano opunga au hi nonḓengu motjinyo tjeyova.
8 Okutanga ngamwa ngu ri eyova kwa sana nokukuta ewe mongarena.
9 Omuano wounongo motjinyo tjeyova ndi mari ya, wa sana nomuyahe ngu yaha ovandu avehe mbu mave kapita.
10 Omuungurise ngu yazema ngamwa eyova ndi mari ya, wa sana nomuyahe ngu yaha ovandu avehe mbu mave kapita.
11 Eyova ndi tjita oviṋa vyouyova potuvari, ra sana nombwa ndji yaruka novikungo vyayo.
12 Ingwi ngu ri eyova tjinene, onguri omusemba pu ingwi ngu tjangovasi eye onongo ngunda e he ri nao.
13 Okutjavi omunatjirweyo tje ha piti mondjuwo? U tira tjike? Ozongeyama?
14 Omunatjirweyo u tanauka mombete tjimuna omuvero mbu tanaukira moviṱiziro vyawo.
15 Omunatjirweyo tja twa eke re motjiyaha, u urwa okuyarura ro motjinyo tje rukwao.
16 Omunatjirweyo u tjangovasi u nozondunge povarumendu hambombari mbe yandja omaziriro omanazondunge.
17 Okuritwa mozombata nḓe hi notjiṋa na ove kwa sana nokukawondja momuvanda nokukakambura ombwa komatwi ndji mai riryangere.
18 Omundu ngu pukisa omukwao tjazumba atja wa ra ma nyanda uriri, 19 wa sana nomundu ngwa vera oviyoze ngu ma nyandisa oviku ovizepe vyomuriro.
20 Tji pe hi nozonguṋe, omuriro u zema, nu tji pe hi nomuhohize woumba, otjiposa tji yanda.
21 Otja omakara punga aye eta orururumo, nozonguṋe punga aze yakisa omuriro, omundu wozombata opunga e hohiza otjiposa.
22 Okuyamba ku tjata nawa, ku tjata tjimuna tji moṋiṋa ovikurya oviwa mbi mavi tjata.
23 Otja onyungu yomunoko punga ai huwa nosilveri, opunga apa sana nomundu ngu nomiṋa omiheze nomutima omunauvi.
24 Omunatjavivi u horeka onyengo ye momambo we, nungwari moukoto we tjandje u novineya. 25 Eye tji ma tararisa eraka re, ove o riyameke ko ku ye, orondu momutima we mu na oviyaukise ovingi. 26 Onyengo ye nandi ya ṱara movineya, ouvi we mau horoka poruhaera.
27 Ngu ma sere omukwao otjitoto ma wire mo omuini; nu ngu ma kunguzurire omukwao ewe, oro mari kotoka ku ye omuini.
28 Eraka rovizeze ri tonda ouatjiri, notjinyo tjotjiwova tji eta ondjandekero.
© Herero Revision Bible © Bible Society in Namibia, 2021.
