1 Okunwa omavinu tjinene ku ku rokohisa na ku ku ririsa eyova. Okupurukisiwa i omavinu ouyova.
2 Tira ombara tji ya pindike otja tji mo tira ovimboro vyongeyama; okupindikisa ombara kwa sana nokurizepa omuini.
3 Eyova arihe ri uta oviposa, nungwari otjiṋa otjiwa tji tja pwira ondjozikiro, okukara ohumburuko noviposa.
4 Omunatjirweyo tje hi nakutaura ehi re romakunino moruveze orusemba, kamaa kakara notjiṋa tji ma kondo moruveze rwomakondero.
5 Omeripuriro womundu momutima we ye ri otja omeva mondjombo onde; nungwari ingwi ngu nozondunge ma yenene okuyeteka.
6 Ovandu ovengi ve rihiva kutja owo ovaṱakame, nungwari owaṋi ngu ma kamuna omundu omuṱakame?
7 Ovaṋingandu ovanatje mbe na ihe omuṱakame nu ngu tjita ihi tji tjiri otjisemba.
8 Ombara ndja haama kotjihavero tjayo tjombanguriro, i muna ouvi auhe nai u sisa.
9 Owaṋi ngu ma yenene okutja nai: “Ami mba ṱakamisa omutima wandje u kare nokuhinatjipo, mba poka kourunde wandje?”
10 Muhona wa tonda ovandu mbe ungurisa ozondjinda novisanekero ovihasemba.
11 Nandarire omuatje u raisa movitjitwa vye kutja eye omukendu; ove mo yenene okuserekarera kutja eye omuṱakame nomukohoke.
12 Muhona we tu pa omatwi okuzuva nomeho okumuna.
13 Tji wa suvera okurara, mo rire omusyona; tji u kara katumba, mo kara novingi okurya.
14 Omurande aruhe u unauna kutja ovirandisiwa vi ningira ovimariva ovingi; nungwari tja i tjandje ma yende ame rihivire imbi mbya randa.
15 Tji una ondjiviro, una otjiṋa otjinanḓengu komeho yongoldo nomawe omahuze.
16 Auhe ngu ri eyova na kwizike kutja ma sutire owozonganda ozondjo ze, ouini we u sokuṱiziwa otja otjisuta tjomoruveze.
17 Mbi mo pewa motjiwova mo ri otja ovikurya ovitjate; nungwari kombunda mavi kasana otja eheke motjinyo tjoye.
18 Paha ondunge ombwa kovandu varwe nove mo toṋa; okarwa ovita nokuhinomerirongerisiro omawa.
19 Humburuka kokure nomundu ngu taka omambo, eye tjinga eha horeke oviundikwa.
20 Ngu ma tukana ihe poo ina omuinyo we mau yanda otja emunine ndi mari zemi monḓorera.
21 Outumbe mbu munika oupupu, korusenina kau nakukaserwa ondaya.
22 O rityere omuini kutja mo sutisa ingwi ngwa tataiza; riyameka ku Muhona a rire ngwe ku vatere.
23 Muhona wa tonda ovandu mbe ungurisa ozondjinda novisanekero ovihasemba.
24 Muhona u zikamisa ozondambo zomundu; omundu ma yenene vi okutjiwa ondjira ye omuini?
25 Rutenga ripura nawa ngunda au hiya kwizikira Muhona ombunguhiro, tjapo mo ripatere ombate.
26 Ombara onongo i vera imba mbe tjita ouvi nokuhinondjenda.
27 Ombepo yomundu oyo emunine ra Muhona; oyo i konḓonona ourekoto womundu auhe.
28 Orusuvero nouṱakame vi yama ombara; ouhona wayo mau zikama tji mai honapara nousemba nouatjiri.
29 Ourenga womitanda owo omasa wavyo, nomaharekero wovakurundu owo zonḓi zawo.
30 Ozongora nḓe hihamisa ozo omuti omuwa omupange, nomatoneno ye eta omberukiro mourekoto womundu.
© Herero Revision Bible © Bible Society in Namibia, 2021.
