1 Okokuwa okurira omusyona au nouatjiri komeho yokukara nomiṋa vyovizeze au ri eyova.
2 Kakokuwa okukara nokuhinondjiviro; okuhinomuretima makukuhitisa moumba.
3 Omundu eyova u rizunḓa omuini novitjitwa vye vyouyova, nu tjazumba a kuminine Muhona.
4 Omutumbe aruhe u kara nomapanga omengi; nungwari omusyona u isiwa nangarire i indi epanga re.
5 Omuhongonone omunavizeze ka kara nokuhinokuverwa; omundu ngu kora ovizeze kamaa poṋa.
6 Ovandu ovengi ve kondja okumuna ondjingonekero yovatjiukwa; omundu ondjandje u kara nomapanga omengi.
7 Omusyona u tondwa i ovazamumwe ve avehe; katjikumise kutja ke nomapanga nangarire kutja ma kondjo pu pe ṱeki pi, omapanga we aruhe maye humburuka na ye.
8 Ngu paha ounongo u ungurira ouwa we omuini; ngu rikendera ozondunge u muna ouṋingandu.
9 Omuhongonone omunavizeze ka kara nokuhinokuverwa; omundu ngu nyomborora ovizeze ma ṱu.
10 Kape nokuyenena komundu eyova okuhupa mevyaro, nu tjinene komeho kape nokuyenena komukarere okuhonaparera ovaingona.
11 Tji u ri omunazondunge mo ritjaere komazenge wa tjimanga; okuisira ozongatukiro okwo ondengero kove.
12 Omazenge wombara ye ri otja okutya ovimboro kwongeyama; nungwari ondjingonekero yombara ya sana otja omueme komahozu.
13 Omuzandu eyova eye otjipo ku ihe; nomukazendu ngu posa wa sana komeva nge tota aruhe.
14 Omurumendu u sora okurumata onganda noutumbe kovanene ve, nungwari Muhona erike ongu sora okumupa omukazendu omunazondunge.
15 Otjirweyo matji ku rarisa ozomboṱu ozonḓeu; rara ozomboṱu ozonḓeu nu u ṱondjara.
16 Ngu ṱakamisa omatwako wa Ndjambi ma hupu orure; nu ngwa nyengura omambo wa Ndjambi ma ṱu.
17 Ngu ṱotjari nomusyona u yazema ku Muhona, nu Muhona me mu sutire po ouwa we.
18 Vyura omuatje woye omuzandu ngunda ape nomaundjiro okumuhonga; nungwari o mu tono tjinene nai nga tji wa zepa.
19 Omundu ngu pindika tjinene u riyetera omberero; tji mokondjo okumuisa mo moumba mo mu pindikisire ko.
20 Tji mo puratene komaronga no yakura omavyuriro, eyuva rimwe mo karira onongo.
21 Omutima womundu u nomeripura omengi, nungwari indji ombango ya Muhona ondji mai yenenisiwa.
22 Otjiṋa otjinanḓengu komundu ondjito ye yorusuvero. Okokuwa okurira omusyona komeho yokurira omunavizeze.
23 Kara nondira ku Muhona nove mo hupu orure no kara nokuhinatjipo.
24 Omunatjirweyo tja twa eke re motjiyaha, ku rira ouzeu ku ye okuriyarura mo motjinyo tje.
25 Tji mo tono omunyekerere; omuhinondjiviro otji ma toora mo ozondunge; tji mo rongo omunazondunge, eye ma kara nondjiviro.
26 Omundu ngu tatumisa ihe, na ingwi ngu ramba ina monganda, eye omuzandu omuhinahoṋi ngu tjita oviṋa vyondjambu.
27 Muatje wandje, tji mo isa okupuratena komaronga, mo nakaura ondjiviro ndji wa vazewa na yo.
28 Omuhongonone womuhingo omuvi u nyengura ousemba. Otjinyo tjomurunde tji sasaura ourunde.
29 Ovanyekerere va pwira okuverwa nokati, nomayova ye sokutonwa momatambo.
© Herero Revision Bible © Bible Society in Namibia, 2021.
