1 Eziriro epore ri wisa omazenge pehi, nungwari indi ekukutu ri hohiza omazenge.
2 Ovandu ozonongo tji mave hungire, ve hongonona ondjiviro, nungwari omayova ye nyomborora oviporoporo.
3 Muhona u muna poṋa apehe; eye u tjevera ovanauvi novasemba.
4 Omambo omapore ye ri otja omuti mbu yandja omuinyo, nungwari inga omandandi ye hihamisa omutima.
5 Okunakaura imbi iho mbye ku honga okwo ouyova; nokuyakura omavyuriro we okwo ounongo.
6 Omusemba u ṱakamisa outumbe we; nungwari omunauvi u pandjarisa imbwi owe, otuveze otuzeu tji twe ya.
7 Ondjiviro i handjaurwa i ozonongo, kai handjaurwa i omayova.
8 Muhona u nonyuṋe ovasemba tji mave kumbu; nungwari ombunguhiro, ndji punguhwa i omunauvi oyo ondjaukise ku Muhona.
9 Muhona wa tonda ondjira yomunauvi, nungwari wa suvera ingwi ngu kondja okutjita ousemba.
10 Tji mo tjiti ouvi mo verwa tjinene; tji u hi nokuvanga okuvyurwa mo ṱu.
11 Otjovakoke nopoṋa pomanyoneno tji vi hi nokusora okutjaera Muhona okutjiwa otjiṋa tji tji ri mu vyo, omundu ma sora vi okuhoreka omeripura we komurungu wa Ndjambi?
12 Omunyekerere ka vanga okuvyurwa, nope ha vangere okuyenda ku ingwi onongo.
13 Omundu tje nenyando momutima, u raisa omurungu wondjoroka; nungwari tja ningisa ondjenda, u yumana mombepo.
14 Omunazondunge u kondja okurihonga, nungwari eyova ri nohange nokukara nokuhinondjiviro.
15 Ehupiro romuṋiṋikiziwa oro ongondjero ongarerere; nungwari ingwi ngu nondjoroka, aruhe u nyanda omikandi.
16 Okokuwa okurira omusyona nokukara nondira ku Muhona komeho yokurira omutumbe au hi norusuvo.
17 Okokuwa okurya ombowa puna omundu ngu wa suvera komeho yokurya onduwombe onḓune poṋa pu pe nonyengo.
18 Omundu ngu pindika tjimanga u pendura oviposa, nungwari ingwi ngu nomuretima u porisa ozombata.
19 Ondjira yomunatjirweyo i ri tjimuna ondjira yomakuiya; nungwari okaira kovasemba oko ka seruka nawa.
20 Omuzandu onongo u yorokisa ihe; nungwari omundu eyova wa nyengura ina.
21 Eyova ri yorokisiwa i ouyova waro; nungwari omunazondunge u tjita imbi mbi ri ovisemba.
22 Yakura ondunge aihe ndji mo sora, nu mo ṋingapara; tji u hi novayandjandunge, mo hipara.
23 Omundu tje neziriro esemba mu ye omuini, u kara nondjoroka; tjiri, eziriro ndi zirwa moruveze orusemba ri yandja ohange.
24 Omundu onongo u twara ondjira ndji yenda kombanda komuinyo, eye ka twara ondjira ndji yenda kehi konḓiro.
25 Muhona u haṋa onganda yomundu otjirangaranga, nungwari u yama ouini womuhepundu.
26 Muhona wa tonda omeripura omanaurunde, nungwari omambo omanahange ye mu pa onyuṋe.
27 Ngu ma tjiti ovihohe ovihasemba ma twa eṱunḓu re moumba; nungwari ngwa tonda okukambura oviṋa vyombopero ma kara nomuinyo.
28 Omusemba rutenga u ripura ngunda e hiya zira; omunauvi u kara neziriro ratjimanga, nungwari tjandje oro mari eta oumba.
29 Omusemba tji ma kumbu, Muhona u mu zuvira, nungwari Muhona u kara kokure nomunauvi.
30 Omeho nge nondjiririsa ye yorokisa omutima; ombuze ombwa i ku pa omasa morutu.
31 Ngu zuva komavyuriro u kara mokati kozonongo.
32 Ngu ma nakaura omavyuriro me rinyengura omuini. Ngu ma yakura omavyuriro ma ririre ko onongo.
33 Ondira ku Muhona oyo omahongero wokumuna ounongo. Ondengero i pitira mokurisusuparisa.
© Herero Revision Bible © Bible Society in Namibia, 2021.
