1 Muhona u nyengwa ovandu mbe ungurisa ovisanekero vyoposyo. Eye u nonyuṋe mozondjinda ozosemba.
2 Ovandu mbe ritongamisa mave yambururwa tjimanga. Okurisusuparisa okwo ounongo.
3 Tji u ri omuṱakame okutja u hongorerwa i ouatjiri. Ovahaṱakama mave yandekwa i ovineya vyawo oveni.
4 Outumbe kau nombatero meyuva romazenge wa Muhona, nungwari ouatjiri ombu mau sora okuyama omuinyo woye.
5 Ousemba womuṱakame u serura ondjira ye, nungwari omurunde u wisiwa i ouvi we omuini.
6 Ovasemba ve yamwa i ousemba wawo, nungwari ovahaṱakama ve pandekwa i oukorokope wawo oveni.
7 Omunauvi tja koka, omaundjiro we ye zenga puna ye. Omaundjiro weyova ye karira pouriri.
8 Omusemba u yeurwa mombamisiro, nomunauvi u yaruka moruveze rwe.
9 Omuraranganda ma sora okunyonwa i omahungi womunauvi, nungwari ovasemba ve yamwa i ondjiviro yawo.
10 Otjihuro tji yoroka ovandu ovasemba tji mave ṋingapara; nu pe kara omaravaerero wondjoroka ovanauvi tji mave koka.
11 Otjihuro tji kurira ko ovaṱakame tji mave tji sere ondaya; nungwari tji yandekwa i omambo wovanauvi.
12 Okuhungira omanyengu kovakweṋu okwo ouyova, nungwari omunazondunge u mwina.
13 Omundu ngu ryanga motuyambo ka ṱiza oviundikwa, nungwari ingwi omuṱakame u ṱiza oviundikwa.
14 Otjiwaṋa tji tji hi nomatjeverero omasemba tji pandjara, nungwari pu pena ovayandjandunge ovengi otjiwaṋa tji kara kehi yondjeverero.
15 Tji wa kwizike okusutira owozonganda ozondjo ze, moka hihamwa omutima, nungwari ngu panḓa okutjita omazuvasaneno ma kara nokuhinatjipo.
16 Omukazendu wotjikaro otjiwa u yozikwa, nungwari ingwi ngwa tonda omeritjindiro omawa eye omuyamburuke.
Omunatjirweyo kamaa tumbu, nungwari omundu epatje ongu ma tumbu.
17 Tji u ri omunatjari, mo riyetere omuini onyuṋe. Tji u ri omuhinotjari, mo rihihamisa omuini.
18 Omunauvi u muna ondjambi yotjiwova, nungwari ingwi ngu tjita imbi mbi ri ovisemba, tjiri, u muna ondjambi.
19 Auhe ngu panḓera pokutjita ousemba ma kara nomuinyo, nungwari ngu panḓera pokutjita ouvi ma koka.
20 Muhona wa tonda ovandu mbe ripura ouvi, nungwari wa suvera imba mbe tjita ousemba.
21 Tjiri, omunauvi kamaa kara nokuhinokuverwa, nungwari onganda yovasemba mai yamwa komberero.
22 Omukazendu omuwa ngu hi novikaro oviwa u ri otja oruuri rwongoldo meyuru rombinda.
23 Oviṋa ovandu ovasemba mbi mave vanga aruhe vi ve pa imbi mbi ri oviwa, nungwari imbi ovanauvi mbi mave vanga aruhe vi eta omazenge wa Muhona.
24 Omundu umwe u pitisa otjimariva tje nouharupu nu a ririre ko omutumbe; nu umwe u kopa tjinene, nungwari a ririre ko omusyona.
25 Tjita ouwa, nu mo ṋingapara. Kovisa ovakweṋu, nu mo kovisiwa.
26 Ovandu ve senga omundu ngu rurupara ovikokotwa, nungwari ve tanga ingwi ngu vi randisa.
27 Tji mo paha imbi vyouwa, mo munu imbi vyonyuṋe ya Muhona, nungwari tji mo rizerire po ourunde, ourunde mbwi mau ya kombanda yoye.
28 Ngu riyameka koutumbe we ma u; nungwari ovasemba ve nyomoka otja oruhapo rwomaso.
29 Omundu ngu hi na ko na tja neṱunḓu re, korusenina eye ke nokukakara notjiṋa.
Eyova aruhe ri rira omukarere wonongo.
30 Ovihape vyovasemba owo omuti mbu yandja omuinyo, nungwari ozondjito zoutwe ze isa po omuinyo.
31 Ingwi ngu ri omusemba u perwa ondjambi ye kombanda yehi; nungwari omurunde nomunauvi ve sutisiwa tjinene komeho.
© Herero Revision Bible © Bible Society in Namibia, 2021.
