Numeri 7 - Herero Revision Bible (HRR)

Oviyambo vyozombunguhiro vyovanane vomihoko

1 Meyuva Moses nda mana okuzika Ondanda yOmahakaeneno, eye we i twirisa ne i yapura puna oviungurise vyayo avihe, notjipunguhiro noviungurise vyatjo avihe wina. 2 Oviuru vyozonganda, mbya ri ovanane vomihoko vya Israel, novarumendu tjingewo mba ri notjiungura tjomavarero, 3 va eta oviyambo vyawo mbi ku Muhona: Omatemba womitutu hamboumwe, nozonduwombe omurongo na mbari; etemba rimwe kovanane vevari peke; onduwombe imwe komunane auhe. Nowo ve vi eta komurungu wOndanda yOmahakaeneno. 4 Nu Muhona wa hungira ku Moses a tja: 5 “Kambura oviyambo mbi ku wo vi ungurisiwe koviungura vyOndanda yOmahakaeneno; nu vi yandja kOvalevi otja koviungura auhe mbi ma ungura.” 6 Komuhingo mbwi Moses otja yandja omatemba nga kOvalevi. 7 Eye wa yandja omatemba yevari nozonduwombe ine kOvagerson otja koviungura vyawo; 8 nomatemba yane nozonduwombe hambondatu kOvamerari. Oviungura vyawo avihe vya ri kehi yondjeverero ya Itamar, omuzandu womupristeri Aron. 9 Nungwari kOvakehat Moses ka yandjere ko omatemba nozonduwombe; orondu owo ve sokutjinda oviungurise oviyapuke koviṱuve vyawo, tjinga e ri mbya ri oviungura vyawo.

10 Ovanane vomihoko va eta oviyambo komayapuriro wotjipunguhiro meyuva, ndi tja twirisiwa; nowo va eta oviyambo vyawo komurungu wotjipunguhiro. 11 Nu Muhona wa tja nai ku Moses: “Omunane auhe nga ete oviyambo vye komayapuriro wotjipunguhiro, auhe meyuva re peke.”

12-83 Nowo va eta oviyambo vyawo otja komakongorerasaneno nga:

Eyuva 1: Omuhoko wa Juda, omunane oNakson, omuzandu wa Aminadab.

Eyuva 2: Omuhoko wa Isakar, omunane oNetanel, omuzandu wa Suar.

Eyuva 3: Omuhoko wa Sebulon, omunane oEliab, omuzandu wa Helon.

Eyuva 4: Omuhoko wa Ruben, omunane oElisur, omuzandu wa Sedeur.

Eyuva 5: Omuhoko wa Simeon, omunane oSelumiel, omuzandu wa Surisadai.

Eyuva 6: Omuhoko wa Gad, omunane oEljasaf, omuzandu wa Reguel.

Eyuva 7: Omuhoko wa Efraim, omunane oElisama, omuzandu wa Amihud.

Eyuva 8: Omuhoko wa Manasse, omunane oGamliel, omuzandu wa Pedasur.

Eyuva 9: Omuhoko wa Benjamin, omunane oAbidan, omuzandu wa Gideoni.

Eyuva 10: Omuhoko wa Dan, omunane oAhieser, omuzandu wa Amisadai.

Eyuva 12: Omuhoko wa Naftali, omunane oAhira, omuzandu wa Enan.

Imbi oviyambo vyozombunguhiro auhe mbya eta vya ri omuhingo umwe, okutja; Otjiyaha tjimwe tjosilveri tji tji nondjinda yokirograma imwe nohinga otja komasanekero wotjouyapuke, notjiyaha tjosilveri tji tji nondjinda mangara yokirograma imwe otja komasasanekero wotjouyapuke, aviyevari vye ura noruhere orunḓunḓura ndwa rungwa nomaze womiṋinga ru rire ombunguhiro yovikurya; notjikangero tjimwe tjomatwimisiro tjongoldo tjondjinda yozongrama 110, tji tje ura novyomoro omuwa; nondwiyona yongombe, nondwezu yonḓu, nondjona yombura imwe i rire ombunguhiro oningiririsiwa; nondwezu yongombo i rire ombunguhiro yokuisapo ourunde; nozondwezu mbari zozongombe, nozondwezu ndano zozonḓu, nozondwezu ndano zozongombo, nozondjona ndano zombura imwe ze rire ombunguhiro yohange.

84-88 Otjivaro atjihe kumwe tjoviyambo vyozombunguhiro mbya etwa i ovarumendu ovanane omurongo na vevari komayapuriro wotjipunguhiro, tja ri nai:

Oviyaha omurongo na vivari vyosilveri, noviyaha vyomapemeneno omurongo na vivari, kumwe mbi nondjinda yozokirograma omirongo vivari na hambombari nohinga;

novikangero vyomatwimisiro vyongoldo omurongo na vivari, kumwe mbi nondjinda yokirograma imwe nohinga, mbye ura novyomoro omuwa;

nozondwezu zozongombe omurongo na mbari, nozondwezu zozonḓu omurongo na mbari, nozondjona zombura imwe omurongo na mbari ze rire ozombunguhiro ozoningiririsiwa puna ozombunguhiro zovikurya nḓa weziwa ko;

nozongombo omurongo na mbari ze rire ombunguhiro yokuisapo ourunde;

nozondwezu zozongombe omirongo vivari na ine, nozondwezu zozonḓu omirongo hamboumwe, nozongombo omirongo hamboumwe, nozondjona zombura imwe omirongo hamboumwe ze rire ozombunguhiro zohange.

89 Otjikando atjihe Moses tji ma hiti mOndanda yOmahakaeneno okukahungira na Muhona, aa zuu eraka, ndi mari hungire ku ye okuza kombanda yotjikamo tjomahanganisiro tji tji ri kOtjipwikiro tjOmerikutiropamwe, pokati kovakerubi vevari.