Numeri 5 - Herero Revision Bible (HRR)

Omatukiro wovandu ovahakohoke

1 Muhona wa hungira ku Moses a tja: 2 “Rakiza kOvaisrael kutja ve pitise avehe mbe nomutjise wongana, na avehe mbe notjikamoha motutu twawo, na imba mba zunḓarisiwa i okuṱuna koturova. 3 Pitiseye ovahakohoke avehe mozondanda, mba zunḓaka komuhingo mbwi, kutja ave ha yamburura ozondanda ami mu mba tura.” 4 NOvaisrael va tjita otja Muhona pa rakiza ku Moses, nave pitisa ovahakohoke avehe mozondanda.

Omasutiro wondjo yourunde

5 Muhona wa yandja ku Moses 6 omazikamisiro nga kutja a raere kOvaisrael: “Omurumendu poo omukazendu tje hi nouṱakame mu Muhona mokutjita ouvi komukwao, 7 eye nge rihepure ourunde we; tjazumba nga sute ondjo aihe ndje na yo ku ingwi ke nondjo, nu nga weze ko ozoperesende omirongo vivari. 8 Nungwari omundu ngwi tja koka e hi nomuzamumwe wopopezu ku maku sutwa indji ondjo, oyo mai sutwa ku Muhona; omasutiro nga maye rire owomupristeri. Omasutiro nga owo omaweziwa kondwezu yonḓu ndji yokumutjitira ombunguhiro yomakohororero. 9 Nu otjiyandjewa atjihe tji matji weziwa koviyandjewa oviyapuke Ovaisrael mbi mave punguhire Muhona, matji rire otjomupristeri ku mave yandja. 10 Oviyandjewa avihe omupristeri mbya pewa mavi rire ovye.”

Etwako roukoze

11 Muhona wa rakiza ku Moses a tja: 12 “Raera kOvaisrael nu itja nai ku wo, ndoovazu omukazendu ngwa kupwa wa katuka na rire omuhaṱakama komurumendu we, 13 nu omurumendu warwe a rara pu ye, omurumendu we omuini ngunda e hi nokutjiwa, ne he mu kamburire, 14 neye a ṱoukoze nomukazendu we ngwa katuka orukupo poo a ṱoukoze na ye ngunda e ha katukire orukupo, 15 omurumendu ngwi nga tware omukazendu we komupristeri puna ihi otjiyambo tjombunguhiro tji matji heperwa po, okutja okirograma imwe yoruhere rwovirya, nu a ha tirire ko omaze womiṋinga nokuhinokuweza ko ovyomoro omuwa, tjinga ai ri ombunguhiro yovikurya mena roukoze, okutja ombunguhiro yokuhorora ourunde.

16 “Nomupristeri nga ete ingwi omukazendu komurungu, e mu kuramise komurungu wa Muhona. 17 Neye nga tirire omeva omayapuke motjitjuma tjomunoko, nu a toore oruuma ndu ri pehi mOndanda yOmahakaeneno, ne ru twe momeva nga. 18 Tjazumba omupristeri nga kuture ozondjise zomukazendu ngwi, nu nga twe ombunguhiro ndji yokuhorora ouhasemba momake womukazendu. Nomupristeri nga ṱize ihi otjitjuma tjomeva womihihamo nge eta osengiro. 19 Nomupristeri nga yanise omukazendu ama tja nai ku ye: ‘Ove tji u ha katukire orukupo, ko nakuhihamisiwa i osengiro, ndji mai etwa i omeva nga. 20 Nungwari tji wa katuka orukupo, 21 Muhona nge ku senge mokati kotjiwaṋa tjeṋu kutja oukazendu woye u rihute, nezumo roye ri sure. 22 Nomeva nga wosengiro ngaye hite pehuri roye nu ye surise ezumo roye nu ye kahute oukazendu woye.’

“Nu ingwi omukazendu nga zire nai: ‘Ngape tjitwe nai! Amen!’

23 “Omupristeri nga tjange omasengiro nga morutuu na kohe omatjangero nga motjiyaha tjomeva womihihamo. 24 Neye nga yandje inga omeva wosengiro komukazendu a nwe kutja ye hite mu ye nu ye mu pe omihihamo omizeu. 25 Nomupristeri nga ise mo ombunguhiro youkoze meke romukazendu, e i yandje ku Muhona ne i tware kotjipunguhiro. 26 Omupristeri nga wote ko eke okuura kombunguhiro yovikurya i rire ombunguhiro yomazemburukisiro, e i ningiririsire kotjipunguhiro, tjazumba a hire omukazendu omeva nga. 27 Nomukazendu ngwi tja katuka orukupo, omeva nga wosengiro maye mu pe omihihamo omizeu, nezumo re mari suru, noukazendu we mau rihutu; neye ma rire omusengiwa mokati kotjiwaṋa tjawo. 28 Nungwari omukazendu ngwi tje hi nondjo, ke nokumuna otjipo; ma yenene okupanduka rukwao.

29 “Indi ondi ri etwako komurumendu tje noukoze, na tje nomeripura wokutja omukazendu we wa katuka orukupo. 30 Omukazendu nga kakuramisiwe komurungu wa Muhona, nomupristeri nga tjite ku ye otja ketwako ndi arihe. 31 Nomurumendu ma rire omuhinandjo, nungwari ingwi omukazendu tje nondjo, ma vererwa ourunde we.”