Omatwako womakwizikiro
1 Moses wa yandja omazikamisiro kovanane vomihoko vyOvaisrael a tja: “Muhona wa rakiza nai: 2 Tji pe nomurumendu ngu ma tjiti omakwizikiro poo oruyano ku Muhona mu me ritjaere kotjiṋa, nga ṱize embo re; eye nga yenenise avihe otja punga a kwizika.
3 “Omukazendu omukombe ngu ri mondjuwo ya ihe, tji ma tjiti omakwizikiro ku Muhona poo tji me ritjaere kotjiṋa, 4 omakwizikiro nomeritjaerero nga maye zikama posi yaindu ihe tji me mu tjaere okutjita nao, eye tja zu nokuzuva ombuze ndji. 5 Nungwari ihe tje mu tjaere okuyenenisa omakwizikiro we, eye tja zu nokuzuva ombuze ndji, ingwi omukazendu ke nakuhepa okuyeyenenisa. Muhona we mu isire, ihe tjinga e mu tjaere okuyeyenenisa.
6 “Omukazendu omukombe tja tjiti omakwizikiro nombango ye aihe poo nokuhinakonatja okuritjaera kotjiṋa ngamwa atjihe, nu tjazumba a kupwa, 7 nga yenenise omakwizikiro we posi yaindu omurumendu we tje mu tjaere, eye tja zu nokuzuva ombuze ndji. 8 Nungwari ingwi omurumendu we tje mu tjaere okuyenenisa omakwizikiro we, eye tja zu nokuzuva ombuze ndji, ingwi omukazendu ke nakuhepa okuyenenisa wo. Muhona me mu isire.
9 “Omakwizikiro womuhepundu poo womukazendu ngwa isiwa ngaye yenenisiwe i ye mu avihe mbya kwizika.
10 “Omukazendu ngwa kupwa tja tjiti omakwizikiro poo oruyano okuritjaera kotjiṋa, 11 nga yenenise omakwizikiro poo oruyano rwe posi yaindu omurumendu we tje mu tjaere, eye tja zu nokuzuva ombuze ndji. 12 Nungwari omurumendu we tje mu tjaere okuyenenisa omakwizikiro we, eye tja zu nokuzuva ombuze ndji, omukazendu ke nakuhepa okuyenenisa wo. Omurumendu we we mu tjaere okuyenenisa inga omakwizikiro we; Muhona me mu isire. 13 Omurumendu we u nousemba okuzeuparisa poo okuzemisa omakwizikiro ngamwa aehe omukazendu nga tjita. 14 Nungwari meyuva omurumendu we tja zu nokuzuva inga omakwizikiro, ne he mu tjaere, omukazendu ngwi nga yenenise imbi mbya kwizika poo mbya yana. Omurumendu wa zeuparisa inga omakwizikiro, indu tje he mu tjaerere, eye tja zu nokuzuva ombuze ndji. 15 Nungwari kombunda eye tja zemisa inga omakwizikiro eye tja zu nokuyezuva, eye me riturisa ondjo moruveze romukazendu we.”
16 Inga onge ri omazikamisiro Muhona nga rakiza ku Moses komakwizikiro womukazendu ngwa kupwa poo womukazendu omukombe ngu ri mondjuwo ya ihe.
© Herero Revision Bible © Bible Society in Namibia, 2021.
