Onḓiro ya Miriam nozondataiziro za Moses mOmeriba
(Eks 17:1-7)1 Momueze omutenga ombongo aihe yOvaisrael ye ya mokuti onguza Sin, nave tono ozondanda mOkades. Miriam oka kokera na rire kapakwa.
2 Nu kamwa ri omeva kOvaisrael avehe okunwa. Nowo otji va sekamena Moses na Aron. 3 Notjiwaṋa tja unaunina Moses atji tja: “Atja rira kokuwa andakuzu twa kokera puna Ovaisrael ovakwetu komurungu wa Muhona. 4 Tji mwa eta otjiwaṋa tja Muhona mokuti onguza mwi kutja tu nyonoke puna ovinamuinyo vyetu, mwa tjitira tjike? 5 Mwe tu pitisira tjike mOengipte nokutueta poṋa popavi mba? Opo kapoṋa pomakunino wovirya poo womikuyu poo womivite poo womindenya; nu wina kape nomeva omanuwa.” 6 Tjazumba Moses na Aron va pita mombongo nave kakurama pomahitiro wOndanda yOmahakaeneno. Nowo va wa onḓurumika, nongeṋangeṋeno ya Muhona ya munika ku wo.
7 Nu Muhona wa hungira ku Moses a tja: 8 “Toora okati ku ke ri momurungu wOtjipwikiro tjOmerikutiropamwe, nu woronganisa ombongo, ove nerumbi roye Aron, nu u hungire koruuwa momeho wawo, norwo maru eta omeva. Komuhingo mbwi otji mo ve pupisire omeva moruuwa no hire ovandu novinamuinyo vyawo.” 9 Moses wa toora okati nga, otja Muhona pe mu rakiza.
10 Moses na Aron va woronganisira ombongo aihe poruuwa, nu Moses arire tja tja ku wo: “Arikaneye, purateneye, va nahanḓu oweṋe! Indu matu mu pupisire omeva moruuwa ndwi are?” 11 Moses wa yera okati na tono na ko oruuwa povikando vivari; nu mwa pupa omeva omengi, nOvaisrael novinamuinyo vyawo va nwa.
12 Muhona arire tja tja ku Moses na Aron: “Eṋe tjinga amu hi nongamburiro mu ami ndja yenena okutjivisa omasa wandje omayapuke kOvaisrael, opu mu hi nakuvehitisira mehi ami ndi mbe ve kwizikira.”
13 Imba opo oopomeva wa Meriba Ovaisrael pu va unaunina Muhona, neye peri raisa ku wo otja ngu ri Omuyapuke. Meriba okutja Omaunaunino.
Ovaedom mave panḓa Ovaisrael okukapita
14 Ovaisrael tji va ri mOkades, Moses otja hinda ovahindwa kombara ya Edom nomambo nga: “Ovazamumwe voye, Ovaisrael, mave tja nai: Ove omuini mo tjiwa omauzeu aehe ngu twa ri na wo, 15 ootate mukururume tji va tjindire mOengipte ku twa kara ozombura ozengi. Ovaengipte va tatumisa ootate mukururume nga ku eṱe. 16 Eṱe otji twa ura ku Muhona, neye we tu zuvira ne tu hindire omuengeri ngwe tu pitisa mOengipte. Nambano oweṱe mba mOkades, otjihuro tji tji ri komukuro wehi roye. 17 Arikana, tu esa tu tuurunge ehi roye! Katu nakutuurungira momahi woye wovikunino poo momivite vyoye, nomeva mozondjombo zoye katu nakunwa; matu ka wondja mOndjirombaranga porwayo; katu nakuyepa kokunene poo kokumuho nga tji twa piti mehi roye.”
18 Nungwari Ovaedom ve mu zira nai: “Eṱe matu mu tjaere okutuurungira mehi retu! Tji mwa tjitire wina matu mu tjakanene natu mu rwisa.”
19 Ovaisrael ve mu zira ave tja: “Matu ka wondja mondjira indji onene uriri, neṱe novinamuinyo vyetu tji twa nu omeva woye matu sutu. Tji matu vanga porwatjo okongwi okukapitira mo uriri.”
20 Ovaedom va yaruka po amave tja: “Eṱe matu panḓa!” Nowo otji ve ve tjakanena notjimbumba otjinene tjovarwe novirwise ovizeu. 21 Ovaedom tjinga ava panḓa, Ovaisrael otji va tanauka nave twara ondjira yarwe.
Onḓiro ya Aron
22 Ovaisrael avehe va womboroka okuza mOkades nave kavaza kondundu Hor. 23 Nu Muhona wa hungira ku Moses na Aron kondundu Hor pomuruko wehi rOvaedom, na tja: 24 “Aron ke nakuhita mehi, ndi mba kwizikira Ovaisrael; eye ma koka, eṋe amuyevari tjinga amwa pirukira omarakiza wandje pomeva wa Meriba. 25 Karondise Aron nomuzandu we Eleasar kondundu Hor, 26 nu kahukure Aron ozombanda ze zoupristeri, u keze zarise momuzandu we Eleasar; orondu Aron ma kakokera ngo.” 27 Moses wa tjita otja Muhona pe mu rakiza. Owo va ronda kondundu Hor, momurungu wOvaisrael avehe. 28 Nu Moses wa hukura Aron ozombanda ze zoupristeri ne ze zarisa momuzandu we Eleasar. Nu Aron wa kakokera ngo kondomba yondundu. Tjazumba Moses na Eleasar otji va heruka kondundu. 29 NOvaisrael avehe tji va zuu kutja Aron wa koka, ve mu tjitira omutambo oure womayuva omirongo vitatu.
© Herero Revision Bible © Bible Society in Namibia, 2021.
