Onḓunino yomihoko mozondanda
1 Muhona wa yandja omazikamisiro nga ku Moses na Aron na tja: 2 “Ovaisrael ngave tone ozondanda, omurumendu auhe potjihako tjeṱunḓu rawo na perapi romunda wawo. Owo ngave tone ozondanda zawo ohumburuko okukondorokisa indji Ondanda yOmahakaeneno.”
3 Komukuma wokomuhuka imba mbe ri overapi romunda wa Juda mave tono ozondanda movimbumba vyawo, kehi yovanane vawo, komuhingo mbwi:
4 Komuhoko wa Juda, omunane oNakson, omuzandu wa Aminadab, otjivaro tjawo tja ri 74,600.
5-6 Komuhoko wa Isakar, omunane oNetanel, omuzandu wa Suar, otjivaro tjawo tja ri 54,400.
7-8 Komuhoko wa Sebulon, omunane oEliab, omuzandu wa Helon, otjivaro tjawo tja ri 57,400.
9 Imba ovavarwa avehe kumwe mozondanda za Juda va ri 186,400.
Owo nga rire mba tenge po okukayenda.
10-11 Komukuma wokeyuva kokumuho imba mbe ri overapi romunda wa Ruben mave tono ozondanda movimbumba vyawo kehi yovanane vawo, komuhingo mbwi:
Komuhoko wa Ruben, omunane oElisur, omuzandu wa Sedeur, otjivaro tjawo tja ri 46,500.
12-13 Komuhoko wa Simeon, omunane oSelumiel, omuzandu wa Surisadai, otjivaro tjawo tja ri 59,300.
14-15 Komuhoko wa Gad, omunane oEljasaf, omuzandu wa Reuel, otjivaro tjawo tja ri 45,650.
16 Imba ovavarwa avehe kumwe mozondanda za Ruben va ri 151,450.
Owo ngave rire ovetjavari okukayenda.
17 Nu imba Ovalevi mave kayenda pokati kovimbumba mbi ovitenga vivari na imbi ovisenina vivari amave tjindi Ondanda yOmahakaeneno. Otjimbumba atjihe matji kayenda momuhingo tjingewo otja tji mave tono ozondanda, atjihe poruveze rwatjo, kehi yerapi romunda watjo.
18 Komukuma wokongurova, imba mbe ri overapi romunda wa Efraim mave tono ozondanda movimbumba vyawo, kehi yovanane vawo, komuhingo mbwi:
19 Komuhoko wa Efraim, omunane oElisama, omuzandu wa Amihud, otjivaro tjawo tja ri 40,500.
20-21 Komuhoko wa Manasse, omunane oGamliel, omuzandu wa Pedasur, otjivaro tjawo tja ri 32,200.
22-23 Komuhoko wa Benjamin, omunane oAbidan, omuzandu wa Gideoni, otjivaro tjawo tja ri 35,400.
24 Imba ovavarwa avehe kumwe mozondanda za Efraim va ri 108,100.
Owo ngave rire ovetjatatu okukayenda.
25 Komukuma wokeyuva kokunene, imba mbe ri overapi romunda wa Dan mave tono ozondanda movimbumba vyawo, kehi yovanane vawo, komuhingo mbwi:
26 Komuhoko wa Dan, omunane oAhieser, omuzandu wa Amisadai, otjivaro tjawo tja ri 62,700.
27-28 Komuhoko wa Aser, omunane oPagiel, omuzandu wa Okran, otjivaro tjawo tja ri 41,500.
29-30 Komuhoko wa Naftali, omunane oAhira, omuzandu wa Enan, otjivaro tjawo tja ri 53 400.
31 Imba ovavarwa avehe kumwe mozondanda za Dan va ri avehe kumwe mozondanda za Dan va ri 157 600.
Owo nga rire mba senine okukayenda otja komarapi womunda wawo.
32 Imba Ovaisrael mba varwa otja kozonganda zawo, ovimbumba pekepeke, avehe kumwe va ri 603 550. 33 Nungwari imba Ovalevi kave varerwe puna Ovaisrael otja Muhona pa rakiza ku Moses.
34 Ovaisrael otji va tjita oviṋa avihe otja Muhona pa rakiza ku Moses. Owo va tona ozondanda, auhe kehi yerapi romunda wawo, nave kayenda, auhe nonganda ye neṱunḓu re.
© Herero Revision Bible © Bible Society in Namibia, 2021.
