Numeri 19 - Herero Revision Bible (HRR)

Omutwe wongombe osaona

1 Norukwao Muhona wa hungira ku Moses na Aron a tja: 2 “Indi oro etwako romazikamisiro Muhona nda rakiza. Raera kOvaisrael kutja ve ku etere ongombe osaona ndji hi notjipo nu ndji hiya kutirwa, 3 nu mu i yandje komupristeri Eleasar. Oyo ngai pitisiwe mozondanda i ka ṱire momurungu we. 4 Nomupristeri Eleasar nga wote ko kombinḓu yayo, ne i pemenene nomunwe potuhambombari okuhungamisa komukuma wokomurungu wOndanda yOmahakaeneno. 5 Notjinamuinyo atjihe, nomukova nonyama nombinḓu noviṋa vyopehuri ngavi ningiririsirwe momurungu womupristeri. 6 Tjazumba omupristeri nga toore orutau rworupapa, nokayao kohisop, norusepa oruserarovazu, nu nge vi yumbe momuriro mu mamu ningiririsirwa indji ongombe. 7 Nu omupristeri nga kohe ozombanda ze ne rikohe morutu; tjazumba otji ma yenene okuhita mozondanda; nungwari ma rire omuhakohoke nga kongurova. 8 Ingwi ngwa ningiririsa ongombe wina nga kohe ozombanda ze ne rikohe morutu; nungwari ma rire omuhakohoke nga kongurova. 9 Nomurumendu ngu ri omukohoke, nga uke imbwi omutwe wongombe ne u twe poṋa popayapuke pendje yozondanda; nowo ngau pwikirwe ombongo yOvaisrael, ve ungure na wo omeva omakohorore; oyo ombunguhiro yokuisapo ourunde. 10 Nu ingwi ngwa uku omutwe wongombe, nga kohe ozombanda ze, nungwari ma rire omuhakohoke nga kongurova. Nu ihi matji rire omazikamisiro omakarerere kOvaisrael na kovozonganda, mba tura mokati kawo.

Okutuṋa korurova

11 “Ngamwa auhe ngwa ṱunu korurova ma kara omuhakohoke oure womayuva hambombari. 12 Meyuva oritjatatu na meyuva oritjahambombari eye nge rikohorore nomeva omakohorore nga, nu otji ma rire omukohoke; nungwari tje hi nokurikohorora meyuva oritjatatu noritjahambombari, ke nokurira omukohoke. 13 Auhe ngwa ṱunu korurova ne he rikohorora ma rire omuhakohoke, tjinga e ha tiririrwe omeva omakohorore. Eye ma yamburura Ondanda yOmahakaeneno ya Muhona. Nomundu ngwi nga kondwe kotjiwaṋa tjOvaisrael.

14 “Omundu worive tja kokere mondanda, ingwi auhe ngwa ri mondanda ndjo moruveze omundu ngwi ndwa koka poo auhe ngu ma hiti mu yo, ma rire omuhakohoke oure womayuva hambombari. 15 Ovitjuma ngamwa avihe, mbi hi novikamo mavi rire ovihakohoke wina. 16 Auhe ngwa ṱunu komundu ngwa ṱire mokuti nengaruvyo poo ngwa kokere mokuti poo auhe ngwa ṱunu keṱupa romukoke poo keyendo ma rire omuhakohoke oure womayuva hambombari.

17 “Ingwi omuhakohoke nga toorerwe omutwe omuṱiṱi waindji ongombe ndja ningiririsirwa okuisa ko ourunde, nu ngau tuwe monyungu, nu ku tiririrwe omeva omakohoke. 18 Omundu worive, eye ngu ri omukohoke, nga toore otjiyao tjohisop, e tji tjaveke momeva ne ye pemenene kondanda na ku imbi oviṋa avihe, na kovandu mbe ri mu yo; wina nga pemenene ingwi ngwa ṱunu keṱupa romukoke poo ingwi ngwa ṱunu ku ingwi ngwa ṱu nengaruvyo poo korurova poo keyendo. 19 Nomundu ngwi ngu ri omukohoke, nga pemenene ingwi omuhakohoke meyuva oritjatatu noritjahambombari; nu nge mu kohorore meyuva ndi oritjahambombari. Ingwi omuhakohoke nga kohe ozombanda ze ne rikohe morutu, neye ma rire omukohoke komuihi.

20 “Auhe ngwa rire omuhakohoke ne he rikohorora ma kara omuhakohoke, tjinga e ha tiririrwe omeva omakohorore; eye ma yamburura Ondanda yOmahakaeneno ya Muhona. Nomundu ngwi nga kondwe kotjiwaṋa tja Ndjambi. 21 Inga ngaye rire omazikamisiro omakarerere ku eṋe. Ingwi ngu ma pemenene omeva omakohorore, wina nga kohe ozombanda ze; nu auhe ngu ma ṱunu komeva omakohorore ma rire omuhakohoke nga kongurova. 22 Ngamwa avihe omuhakohoke ku ma ṱunu mavi rire ovihakohoke, nu auhe ngu ma ṱunu ku ye poo koviṋa mbi ma rire omuhakohoke nga kongurova.”