Mirjam ma pewa omberero
1 Moses wa kupire omukazendu Omukusi, nu Miriam na Aron otji ve mu hemba mena rotjiṋa hi. 2 Owo ave tja: “Muhona wa hungira ku Moses erike are? Ka hungirire ku eṱe wina are?” Nu Muhona wa zuva imbi mbyaa ve hungire. 3 Moses wa ri omurumendu omurisusuparise tjinene povandu avehe mbe ri kombanda yehi.
4 Kamanga Muhona wa tja ku Moses na Aron na Miriam: “Eṋe poutatu weṋu, indjeye kOndanda yOmahakaeneno.” Nowo va ya. 5 Nu Muhona wa rauka motjikamba, a kakurama pomahitiro wOndanda na isana Aron na Miriam. Aveyevari va ryama popezu. 6 Muhona wa tja: “Arikaneye, zuveye omambo wandje! Tji mu nombuke mokati keṋu, ami, Muhona, me rimunikisa motjirimunikise ne hungire ku ye moruroto. 7 Nungwari omukarere wandje Moses, eye ke ri nao. Eye omuṱakame motjiwaṋa tjandje atjihe tja Israel. 8 Ami mbi hungira puna ye otjinyo notjinyo, ongahukiro, mu mu he ri momahakwa. Tara, nangarire ombunikiro yandje we i muna. Tji mu ha tirire okuhungira omukarere wandje Moses navi, okutjavi?”
9 Nu Muhona wa ṱomazenge na wo, na zu po pu wo, 10 notjikamba tji tja za ko kOndanda, Miriam wa vera omutjise wongana na rire omuvapa twee. Aron wa taviza ku ye na munu kutja Miriam wa vere omutjise wongana. 11 Aron opa tjera ku Moses: “Arikana, Muhona, o tu sutisire ourunde mbu twa tjita mouyova wetu. 12 O tjiti kutja Miriam a kare otja okanatje ku ka kwatwa aka koka, norumbembera rwako arwa wora.”
13 Nu Moses wa ura ku Muhona a tja: “Arikana, Ndjambi, mu verukisa!”
14 Nu Muhona wa tja ku Moses: “Andakuzu ihe we mu tjekera omate momurungu, katja ṱohoṋi oure womayuva hambombari are? Nga paterwe pendje yozondanda oure wotjivike, tjazumba arire tja yakurwa rukwao mozondanda.” 15 Miriam otja paterwa pendje yozondanda oure womayuva hambombari; notjiwaṋa katji kaendere komurungu, Miriam ngunda e hiya yakurwa rukwao. 16 Kombunda yanao otjiwaṋa tja kaenda okuza mOhaserot natji kazika ozondanda mokuti onguza Paran.
© Herero Revision Bible © Bible Society in Namibia, 2021.
