Omeripura wokuyenga Nehemia
1 Sanbalat na Tobija na Gesem novakwao novanavita na eṱe, va zuva kutja eṱe twa mana okutungurura orumbo, nokutja kamwa ri ozondovi mu rwo, nangarire kutja ingee katu twire po omivero pomahitiro. 2 Sanbalat na Gesem otji ve ndji hindira ombuze yokutja tu hakaenene mu tjimwe tjovirongo morutjandja rwa Ono. Inga ya ri ondunge yokutja ve ndji tjite otjipo. 3 Ami mbe ve hindira ovatumwa ve katje nai kuwo: “Me ungura oviungura ovinanḓengu, nu hi nokuyenena okuya ngo. Ami himee isa oviungura vi kurame, kokutja mbi ye ku eṋe uriri.”
4 Owo ve ndji kotorera ombuze tjingeyo ndji povikando vine, nu otjikando atjihe peke ami mbe ve yarurira eziriro tjingero.
5 Tjazumba Sanbalat otje ndji tumina omukarere we umwe nombuze oitjatano, noyo ya hindwa morutuu ndu ha paterwe. 6 Orutuu ndwi rwa tjangerwe nai: “Gesem me ndji raere kutja pe nombuze, ndji mai serekarerwa moviwaṋa oviraranganda kutja ove notjiwaṋa tjOvajuda mamu vanga okuzungana, nokutja ove opu mo zu okutungurura orumbo. Eye wina ma tja ove omuini movanga okurizika okurira ombara, 7 nokutja wa twa po ovaprofete tjiva ve zuvarise mOjerusalem kutja oove ombara ya Juda. Omuhona ombara, tjiri, otjiṋa hi me tji zuu; nami otji me ningire kutja u ye tu zuvasane.”
8 Ami mba yarura eziriro ndi ku ye e tja: “Kape na tjimwe tji mo hungire ouatjiri, avihe mbi vya pitire move omuini uriri.”
9 Owo aave kondjo okutumumaparisa kutja tu ise oviungura. Ami mba kumba e tja nai: “Nambano, Ndjambi, ndji pao omasa!”
10 Moruveze ndwi ami mba karyanga ku Semaja, omuzandu wa Delaja, nondekurona ya Mehetabel, eye tjinga aa ha sora okupita mondjuwo ye. Eye wa tja nai ku ami: “Eṱe na ove ngatu kaṱare mOtjouyapuke mondjuwo ya Muhona, nu tu pate omivero, owo tjinga amave ya okukuzepa. Owo mave ya okukuzepa nambano nai mouṱuku.”
11 Ami mba zira nai: “Ami kawami omurumendu ngu mbi tupuka nokukaṱara. Mo ripura kutja ami me yenene okukaṱara mondjuwo ya Muhona, ne kara nomuinyo are? Himee tjiti nao.”
12 Tji mba zu nokuripura otjiṋa hi otji mba tjiza kutja Ndjambi kangwa hungire na Semaja, nungwari Tobija na Sanbalat ombe mu popa notjimariva kutja e ndji pe omaronga nga. 13 Owo ve mu kuta kutja e ndji mumaparise mbi ture ondjo, nokutja ve zunḓe ena randje, nu ve ndji nyekerere.
14 Mba kumba e tja: “Ndjambi, zemburuka imbi Tobija na Sanbalat mbi va tjita, nu u ve vere. Zemburuka omukazendu omuprofete Noadja, novaprofete avehe varwe mba kondja okundjimumaparisa.”
Omamanukiro woviungura
15 Kombunda yomayuva omirongo vitano na yevari woviungura, orumbo aruhe otji rwa manuka meyuva oritjamirongo vivari na yetano komueze Elul. 16 Ovanavita na eṱe moviwaṋa mbye tu kondorokere tji va zuva otjiṋa hi, otji va uruma, tjinga ava tjiwa kutja oviungura mbi vya ungurwa nombatero ya Ndjambi.
17 Moure woruveze aruhe ndwi ovanane vOvajuda va tjangasana otutuu na Tobija. 18 Ovandu ovengi mOjuda va ri komunda we mena romukwe we Omujuda Sekania, omuzandu wa Arak. Wina omuzandu we Johanan wa kupire omusuko wa Mesulam, omuzandu wa Berekja. 19 Ovandu aave serekarerere momurungu wandje ovitjitwa avihe oviwa Tobija mbya tjita, nu aave mu raere oviṋa avihe ami mbiye hungire. Nu Tobija aa kara pokundjihindira otutuu twokundjimumaparisa.
© Herero Revision Bible © Bible Society in Namibia, 2021.
