Nehemia ma taara ovemupirukire
1 Sanbalat tja zuva kutja eṱe Ovajuda twa uta okutungurura orumbo, otja pindika na utu okutuyamburura. 2 Eye wa hungirira nai povakwawo na povira vyovarwe vOvasamaria wovita a tja: “Ovajuda, imba oviporoporo, mave ripura okutjita tjike? Mave vanga okutungurura otjihuro are? Mave ripura kutja mokupunguha ozombunguhiro mave mana oviungura meyuva rimwe are? Mave sora okuungura omawe wokutunga poviyaya mbya pya are?”
3 Tobija, Omuamoni, wa kuramene mbo posi ya Sanbalat, na weza okuhungira a tja: “Orumbo ndwa sana pi ndu mave tungu? Nangarire ombandje tji ye rivete mo maru wire pehi!”
4 Ami mba kumba e tja nai: “Puratena ku wo, tji mave tu nyekerere, Ndjambi! Ondjambu yawo nga i wire koviuru vyawo oveni. Ngave yekwe oviṋa avihe, mbi ve na vyo, nu ve twarewe otja ovahuurwa kehi rozonganda! 5 O ve isire ko ourunde mbu ve tjita, nu o ve zemisire ko ouvi wawo, owo tjinga amave tuyamburura, mbu matu tungu.”
6 Eṱe otji twa tungurura orumbo komurungu, nu mokamanga orwo rwa ri ohinga kokumanuka, ovandu tjinga ava ri nombango okuungura.
7 Sanbalat na Tobija nOvaaraba nOvaamoni nOvaasdod va zuva kutja otjiungura tjokutungurura orumbo rwa Jerusalem tji ryamenako komurungu, nokutja ozondovi morumbo zauta okusetikwa; nowo otji va pindika tjinene. 8 Komuhingo mbwi owo avehe otji ve rikuta kumwe kutja ve ye okurwisa Jerusalem, nu ve tji zunganise.
9 Nungwari eṱe twa kumba ku Ndjambi wetu atu twa po ovatjevere omutenya nouṱuku.
10 Ovajuda va imbura eimburiro, ndi mari tja:
“Omasa wovatjinde vomitwaro ya yanda,
nungwari ingee pe noviyaya ovingi okuisapo.
Eṱe kamaatu mana okutunga orumbo ndino.”
11 Ovanavita na eṱe ve ripura kutja katu nokuvemuna poo katu nokutjiwa mbi mavi tjitwa, nga tji ve ya kombanda yetu, ve tu zepe nu ve yandise oviungura vyetu. 12 Nungwari ovikando ovingi Ovajuda, mba turire mokati kovanavita na eṱe, ve ya okututjivisa indji ondunge ovanavita ndji va tungire eṱe. 13 Ami mba rongerisa ovandu nomangaruvyo nomanga nomauta, ne ve twa otja kozonganda zawo kongotwe yorumbo poṋa pu rwa ri aru hiya manuka.
14 Ami mba muna kutja ovandu ve nongendo, notji mba tja nai ku wo na kovanane na kovahongore vawo: “Amu tira ovanavita na eṱe. Zemburukeye kutja Muhona omunene nomutirise, nu rwireye ovakweṋu novanatje novakazendu veṋu, nozonganda zeṋu.” 15 Ovanavita na eṱe va zuva kutja eṱe twa tjiza kutja mave vanga okutusekamena, notji va tjiwa kutja Ndjambi wa pambaukisa omeripura wawo. Eṱe atuhe twa yaruka natu katungurura orumbo.
16 Okuzambo orumbembera rumwe rwovarumendu vandje aa ru tungu, ngunda indwi orukwao arwa zara ozombanda zovitenda narwe ripangaṋa nomanga notuvao nomauta otja ovatjevere. Novanane vetu va vatera otjiwaṋa atjihe, 17 tjaa tji tungu orumbo. Nangarire imba mbaa ve toora oviungurise vyomatungiro ave ungura neke rimwe, nu meke rarwe tjandje ve notjirwise. 18 Nu auhe ngwaa tungu, aa kara nengaruvyo mongonda. Omurumendu omuposise wohiva wa kuramene puna ami. 19 Ami mba raera otjiwaṋa novahongore novanane vatjo e tja: “Oviungura vyorumbo vya tandavara tjinene, nga tji twa karasana kokure nokokure kombanda yorumbo. 20 Tji mwa zuu ombosiro yohiva, woronganeneye pu ami. Ndjambi wetu me tu rwire.” 21 Eyuva arihe, okuza menyunguhuka nga kongurova ozonyose tji za munika, orumbembera rumwe rwetu aa ru ungura korumbo, indwi orukwao ngunda amaru tjevere nomanga.
22 Moruveze ndwi ami mba raera ovarumendu mba ri moviungura kutja; owo novavatere vawo avehe nga ve kare mOjerusalem ouṱuku kutja tu sore okutjevera otjihuro ouṱuku nokuungura mutenya. 23 Ami hiye rihukura ozombanda zandje, nangarire ouṱuku, na imba ovakwetu novakarere vandje novatjevere vandje vokorutu wina. Atuhe aa tu kara novirwise momake.
© Herero Revision Bible © Bible Society in Namibia, 2021.
