Nehemia 13 - Herero Revision Bible (HRR)

Okuhaṋika novandu wozonganda

1 Etwako ra Moses tji ra reserwa otjiwaṋa neraka enene, otji pa munika omahungi ngu maye tja kape nOmuamoni poo Omumoab ngu maa yandjerwa okuwana notjiwaṋa tja Ndjambi. 2 Pa tjitwa nao mena rokutja Ovaamoni nOvamoab kave yandjere ovikurya nomeva kOvaisrael morutjindo rwawo okuza kOengipte. Moruveze rwanao owo va suta ovimariva ku Balaam kokutja ve senge Ovaisrael; nungwari Ndjambi wetu wa rundurura osengiro okurira ondaya. 3 Ovaisrael tji va zuva etwako ndi amari resewa, otji va isa mo ovozonganda avehe mombongo yawo.

Omarundururiro Nehemia nga tjita

4 Omupristeri Eljasib, ngwa ri notjiungura tjokutjevera omatuwo womapwikiro wondjuwo ya Muhona wa kara pamwe nawa na Tobija oruveze orure tjinene. 5 Eye wa yandjera Tobija kutja a kare netuwo enene, rutenga nda ri etuwo romapwikiro roviṋa mbi porwavyo: Oviyambo vyozombunguhiro zovikurya, novyomoro omuwa, noviungurise vyondjuwo ya Muhona, noviyambo mbya tyerwa ovapristeri, notjitjamurongo tjovikokotwa notjomavinu notjomaze womiṋinga, mbya tyerwa Ovalevi novaimbure novatjevere vondjuwo ya Muhona. 6 Otjiṋa hi ngunda ama tji tjitwa, ami tjandje hi mo mOjerusalem, orondu mombura oitjamirongo vitatu na mbari youhona wa Artakerkes, ombara ya Babilon, ami mba yarukire okukaserekarera ku ye. Kombunda yoruveze rworive ami mba ningira ousemba wokuyaruka kOjerusalem, 7 notji mba yaruka. Nu ami mba kumwa tji mba kamuna kutja Eljasib wa yandjera Tobija okukara metuwo rimwe rondjuwo ya Muhona. 8 Mba pindikire tjinene, notji mba nakaurira oviṋa avihe vya Tobija pendje. 9 Ami mba rakiza kutja etuwo ndi ri kohororwe, nokutja oviungurise vyondjuwo ya Muhona noviyambo vyozombunguhiro zovikurya novyomoro omuwa vi yarurwe mo.

10 Wina mba tjivisiwa kutja ovaimbure vondjuwo ya Muhona nOvalevi varwe va zire mo mOjerusalem, nokutja va yaruka kozohambo zawo, otjiwaṋa tjinga aatji he ve pe mbya yenena okuvehupisa. 11 Ami mba tena ovahongore mena rokutja va tjinda ondjuwo ya Muhona ouhazendu. Otji mba kotora Ovalevi novaimbure kondjuwo ya Muhona, ne ve yarura moviungura vyawo. 12 Tjazumba Ovaisrael avehe otji va uta okueta rukwao otjitjamurongo tjawo tjovikokotwa notjomavinu notjomaze womiṋinga komatuwo womapwikiro wondjuwo ya Muhona. 13 Ami mba zika ovarumendu mba mokutjevera omatuwo womapwikiro: OSelemja, omupristeri, na Sadok, omuhongewa wOmatwako, na Pedaja, Omulevi. Hanan, omuzandu wa Sakur nondekurona ya Matanja, ongwa ri omuvatere wawo. Ami ee tjiwa kutja ovarumendu mba ovasemba mokuhaṋa oviyandjewa kovaungure ovakwao.

14 Ndjambi wandje, ndji zemburukira oviṋa mbi avihe oviwa mbi mba tjitira ondjuwo yoye nomerikotameneno wayo.

15 Momayuva ngo ami mba muna ovandu mehi ra Juda mbaa ve kama oruaze rwomandjembere mesabata. Varwe aave kutire ovikokotwa nomavinu nomandjembere nomakuyu noviṋa vyarwe kousino wawo, nokuvihitisa mOjerusalem mesabata; ami mbe ve ronga kutja ave ha randisa ngamwa otjiṋa mesabata. 16 Ovarumendu tjiva, mba zire motjihuro Tirus, va turire mOjerusalem; nowo va eta ozohi noviṋa ngamwa avihe motjihuro kokutja ve vi randise kotjiwaṋa tjetu mesabata. 17 Ami mba tena ovanane vOvajuda ne tja nai: “Tareye ouvi mbu mu tjiti. Kamu nokuyapura esabata. 18 Muhona opa za okuvera ooiho mukururume, indu tja eta onyoneno kotjihuro hi. Nu ingee mamu etere ko omazenge wa Ndjambi kOvaisrael mokuyamburura esabata.”

19 Ami otji mba rakiza kutja omivero vyotjihuro vi patwe momautiro wesabata arihe tjimanga omuihi tji mau utu nokutja avi ha patururwa nga esabata tji ra kapita. Mba twa ovarumendu vandje tjiva pomivero, ve tjevere nawa kutja ape ha etwa otjiṋa motjihuro mesabata. 20 Potjikando tjimwe poo povikando vivari ovarandise mbaa ve randisa oviṋa ngamwa avihe, aave rara pendje yorumbo rwa Jerusalem ouṱuku wOritjatano. 21 Mbe ve ronga e tja nai: “Kahepero okuundjira pendje nao uriri nga tji pa tji. Tji mwa tjiti nai rukwao, ami me mu kambura. Okuzambo owo kave na pu va kotoka mesabata rukwao.” 22 Ami mba rakiza kOvalevi kutja ve rikohorore oveni, nokutja ve katjevere omivero nokukonḓonona kutja esabata ri yapurwe tjiri.

Ndji zemburuka motjiṋa hi wina, Ndjambi wandje, nu u ndji yame motjari tjoye otjinene.

23 Moruveze ndo wina ami mba muna kutja ovarumendu ovengi Ovajuda va kupire ovakazendu, mba zire kotjihuro Asdod na kehi ra Amon nora Moab. 24 Orumbembera rumwe rwovanatje vawo aa ru hungire Otjiasdod poo eraka rimwe rarwe, nu kaa ru tjiwa okuhungira eraka retu. 25 Ami mba tena ovarumendu mba, e ve sengi, e ve tono, ne ve nana ozondjise. Tjazumba e ve yanisa mena ra Ndjambi kutja owo poo ovanatje vawo ave ha kupasana novandu wozonganda rukwao. 26 Mba tja nai: “Ovakazendu wozonganda omba turisa Salomo ondjo. Eye wa ri omurumendu omunauvara pozombara azehe zoviwaṋa vyarwe. Ndjambi we mu suverere, neye ope mu zikira a rire ombara ya Israel atjihe, nungwari eye wa wira mouvi mbwi. 27 Nambano ngatu horere kotjihorera tjeṋu tjokukara nokuhinonḓuviro ku Ndjambi wetu mokukupa ovakazendu wozonganda are?”

28 Jojada wa ri omuzandu wa Eljasib, Omupristeri Otjiuru, nungwari umwe wovazandu va Jojada wa kupa omusuko wa Sanbalat ngwa zire kotjirongo Bet-Horon; ami otji mba ramba Jojada mOjerusalem.

29 Ndjambi, zemburuka ovandu mbo mba yamburura oupristeri nomerikutiropamwe ove ngu wa tjita novapristeri nOvalevi.

30 Ami otji mba kohorora otjiwaṋa koviṋa avihe vyambangu; mba ṱunina ovapristeri nOvalevi omazikamisiro kutja auhe wawo a tjiwe otjiungura tje. 31 Wina mba ṱuna ozonguṋe zozombunguhiro ozoningiririsiwa kutja ze etwe motuveze otusemba, nokutja ovandu ve ete oviyambo vyawo vyozombunguhiro zovitengakuhora vyovikokotwa novyovihape.

Zemburuka avihe mbi, Ndjambi wandje, nu u ndji pe ondjambi yandje!