Nehemia me rikendere Jerusalem
1 Inga owo omaserekarerero waimbi Nehemia, omuzandu wa Hakalja, mbya tjita.
Momueze Kislev mombura oitjamirongo vivari, Artakerkes tja ri ombara ya Persie, ami, Nehemia, mba ri mOsusa, otjihuro ohongora. 2 Hanani, umwe wovangu vandje, weya okuza kOjuda puna ovarumendu tjiva. Nami mbe ve pura Jerusalem nOvajuda ovakwetu, mba kotokere okuza kouhuura mObabilon. 3 Owo ve ndji raera kutja imba mba hupire nu mba kotokere kozoyawo va ri mouzeu ounene, nokutja imba ovozonganda mba turire popezu ve ve nyengura. Owo wina ve ndji raera kutja otumbo twa Jerusalem ingee twa haṋika, nokutja omivero ingee kaviya yarurwa ko okuza koruveze ndwi ndu vya nyosirwe. 4 Ami tji mba zuva oviṋa mbi mba kara pehi ne riri.
Oure womayuva tjiva mba kara moruhoze, ambe ritjaere kovikurya, nekumbu nai ku Ndjambi: 5 “Muhona, Ndjambi weyuru! Oove Ndjambi omunene ngu u sokutiriwa! Ove u ṱakamisa omerikutiropamwe woye nouṱakame puna imba mbe ku suvera, nu mbe kara nonḓuviro komatwako woye. 6 Puratena, nu u tare ku ami, Muhona! Ndji zuvira ongumbiro yandje tji me kumbire ovakarere voye, ihi otjiwaṋa tja Israel, ouṱuku nomutenya. Ami me rihepura kutja eṱe, Ovaisrael, twa tjita ouvi; ootate mukururume na ami twa tura ondjo. 7 Eṱe twa tjita ourunde komurungu woye, nu katu yenenisire imbi mbi wa rakiza. Eṱe katu ṱakamisire omatwako ngu we tu pa notjinyo tja Moses, omukarere woye. 8 Zemburuka omambo ngu wa raera ku Moses, indu tji wa tja: ‘Eṋe, tjiwaṋa tja Israel, tji mu hi nouṱakame mu ami, me mu rimbi mokati koviwaṋa. 9 Nungwari tji mwa kotoka ku ami namu tjiti imbi mbi mbe mu rakiza me mu yarura koṋa ku mbe mu toororera okurikotamenenwa po, nangarire kutja mwa rimbara nga kovikoro vyehi.’
10 “Muhona, ovakarere voye owo mba, ihi otjiwaṋa tjoye omuini. Ove we ve yama nomasa nouvara woye. 11 Nambano zuvira ongumbiro yandje nozongumbiro zovakarere voye avehe varwe mbe vanga okukuyozika. Ndji pao ouṋingandu ndinondi, nu u tjite kutja ombara i ṱotjari na ami.”
Moruveze ndo ami tjandje owami omutirire womavinu wombara.
© Herero Revision Bible © Bible Society in Namibia, 2021.
