Markus 7 - Herero Revision Bible (HRR)

Omahongero wootate mukururume

1 Ovafarisei nozonongo zomambo tjiva, mba zire kOjerusalem va woronganena pu Jesus. 2 Owo va muna ovahongewa va Jesus tjiva amave ri ovikurya nomake nga tunḓaka, okutja onomake nge hiya kohwa.

3 (Orondu Ovafarisei nOvajuda avehe ve horera kombazu yooihe mukururume: Owo kave ri ovikurya ngunda ave hiye rikoha komake. 4 Nu wina tji mave zu koruveze romarandisiro kave ri ovikurya ngunda rutenga ave hiye rikoha oveni. Owo wina ve nozombazu nḓu ve ṱakamisa tjimuna imbwi omuhingo omusemba wokukoha ovinwino, nomahoro, novitjuma vyongoporo, novimata vyokusuva).

5 Ovafarisei nozonongo zomambo otji va pura Jesus ave tja: “Okutjavi ovahongewa woye tji ve ha hupu otja kombazu yootate mukururume, nu tji ve rya ovikurya nomake nge hiya kohwa?”

6 Jesus we ve zira a tja: “Omuprofete Jesaja wa sora indu tja profeta ohunga na eṋe! Oweṋe ovanatjavivi, otja eye punga a tjangere na tja:

‘Ndjambi ma tja, otjiwaṋa hi, tji ndji yozika nomambo,

nungwari omutima watjo u ri kokure na ami.

7 Owo mave rikotamene ku ami omungandjo uriri,

orondu owo ve honga omahongero wovandu,

aayo owo onge ri omatwako wa Ndjambi!’

8 “Eṋe mu nakaura omatwako wa Ndjambi, nu mu kara nonḓuviro kombazu yovandu.”

9 Nu Jesus wa hungira komurungu na tja: “Eṋe muno muhingo omuwa mbu mu nakaura nawo etwako ra Ndjambi kokutja mu kakatere kombazu yeṋu. 10 Orondu Moses wa tjere: ‘Yozika iho na nyoko,’ nu ‘ngamwa ngu ma sengi ihe poo ina, nga ṱe.’ 11 Nungwari eṋe mu honga ovandu kutja omundu ma yenene okutja nai ku ihe poo ku ina: ‘Otjiyandjewa ngamwa atjihe tji mo sokupewa i ami otjo oKorban’ (okutja, otjiyandjewa tjombunguhiro ku Ndjambi). 12 Eṋe otji mu ha yandjere omundu ngwi kutja a vatere ihe poo ina otjiṋa. 13 Momuhingo mbwi ombazu yeṋu ndji mu honga kovandu ye ve tjita kutja embo ra Ndjambi ri rire omungandjo uriri. Nu wina pe noviṋa vyarwe ovingi mbya sana ku imbi mbi mu tjita.”

Oviṋa mbi zunḓa omundu

(Mt 15:10-20)

14 Jesus wa isanena otjimbumba tjovandu rukwao ku ye na tja: “Purateneye ku ami amuhe, nu mu zuve nawa. 15 Otjiṋa tji tji za pendje nu atji hiti momundu, katji tji zunḓa omundu, posi ya, ihi tji tji za momundu otji tji zunḓa omundu. 16 Ngu nomatwi okuzuva nga zuve.”

17 Jesus wa zapo potjimbumba na kahita mondjuwo, novahongewa ve otji ve mu ningira kutja e ve handjaurire omasanekero nga. 18 Eye wa tja ku wo: “Eṋe nangwari wina kamu nakuzuva nawa otjiṋa hi are? Kamu nokutjiwa kutja atjihe tji tji za pendje nu atji hiti momundu katji tji zunḓa omundu, 19 otjo tjinga atji ha hiti momutima we, nungwari tjinga atji hita mezumo re nu atji kapita morutu rwe are?” Komuhingo mbwi Jesus otja zuvisa kutja ovikurya avihe vya pwa okuriwa.

20 Nu eye wa hungira komurungu a tja: “Ihi tji tji za momundu otji tji zunḓa omundu. 21 Orondu momundu, moukoto womutima womundu, omu mu za omeripura omavi, okutja; ombakirasaneno, ourunga, omazepero, 22 okukatuka orukupo, omunenetima, okutjita oviṋa ovivi pekepeke; ovineya, ouhakohoke, eruru, okuyambururasana, omeritongamisiro, nouyova. 23 Oviṋa avihe ovivi mbi vi za moukoto womundu, nu ombi mu zunḓa.”

Ongamburiro yomukazendu Omukanaan

(Mt 15:21-28)

24 Tjazumba Jesus wa ya korukondwa rwehi rotjihuro Tirus. Eye wa kahita mondjuwo yorive, e hi nokuvanga kutja a tjiukwe i omundu, nungwari eye ka yenenene okurihoreka. 25 Tjimanga omukazendu, ngwa ri nomukazona ngwa ri nombepo ohakohoke, wa zuva Jesus, notje ya ku ye, ne riwisire pozombaze ze. 26 Omukazendu ngwi wa ri Omugrike, ngwa kwaterwa morukondwa rwa Fenisie, mehi ra Sirie. Eye we riyarikaṋa ku Jesus kutja a pitise ombepo ohakohoke momuatje we omukazona. 27 Nungwari Jesus wa zira a tja: “Rutenga ngatu kutise ovanatje, orondu kakokuwa okutoora ovikurya vyovanatje nokuviumbira ozombwa.”

28 Omukazendu wa zira a tja: “Muhona, nangarire oumbona wina u rya ovikurya ovanatje mbi va wisire kehi yotjiriro!”

29 Nu Jesus arire tja tja komukazendu: “Mena romambo woye ngu wa hungire ngo, nambano yaruka koyoye; ove mo kavaza ombepo ohakohoke aya piti momuatje woye.”

30 Omukazendu wa yaruka koye nu a kavaza omuatje we a rangavara kombete, tjandje nao ombepo ohakohoke ya piti rukuru mu ye.

Jesus ma verukisa omundu otjikume nu omboro

31 Jesus wa zire mo rukwao morukondwa rwa Tirus, a tuurunga ehi ra kOsidon, na kavaza kOmuronga wa Galilea mehi ra Dekapolis. 32 Ovandu tjiva otji va eta omundu ku ye ngwa ri omboro nu ngwa patere eraka, nu ave riyarikaṋa kutja Jesus a yambeke omake we ku ye. 33 Jesus otja isa mo omundu ngwi motjimbumba, e mu twara peke, a twa mo ominwe vye momatwi we, a tjeke omate nu a ṱunu keraka re. 34 Okuzambo Jesus wa tara keyuru, a tjeme nomasa na tja komundu ngwi: “Efata,” okutja “Paturuka!”

35 Tjimanga omatwi womundu ngwi otji ya paturuka, neraka re ari kutuka na utu okuhungira nawa. 36 Jesus wa rakiza ovandu kutja ave ha serekarere otjiṋa hi komundu; nungwari punga e ve tjaera okutjita nao, owo opunga aave tji zuvarisire ko. 37 Nu avehe mba zuvire otjiṋa hi va himinwe tjinene nave tja: “Eye wa sora oviṋa avihe. Wa yandja okuzuva kozomboro, nokuhungira ku imba ovikume.”