Jesus ma verukisa omundu ngu nozombepo ozohakohoke
(Mt 8:23-34Lk 8:26-39)1 Jesus novahongewa ve va vazere munda mbwina womuronga wa Galilea mehi ra Gerasa. 2 Nu Jesus tja za nokuheruka mokayaha, arire tja hakaene nomundu ngwaa zu komaendo. Omundu ngwi wa ri nombepo ohakohoke, 3 nu aa tura momaendo. Kapa ri omundu ngwaa sora okumupandeka nouketanga, 4 orondu potuingi ozombaze ze nomake we aaye pandekwa nouketanga, nungwari otjikando atjihe eye aa pora ouketanga nu aa timbura omapando kozombaze ze. Eye wa ri nomasa tjinene nga tji pe ha ri omundu nguye mu uru. 5 Aruhe omutenya nouṱuku eye aa ryanga momaendo na mozondundu ama uru name rikondo nomawe.
6 Eye tja muna Jesus okuza kokure, wa utuka, ne rikotamene ku ye; 7 na ravaere neraka enene a tja: “Jesus, Muna wa Ndjambi wOkombandambanda, ove u na tjike na ami? Me riyarikaṋa kove mena ra Ndjambi, o ndji hihamisa!” 8 Eye wa hungira omambo nga Jesus tjinga a tja ku ye: “Mbepo ohakohoke, za mo momurumendu ngwi!”
9 Jesus arire tje mu pura a tja: “Ena roye oove aṋi?”
Omurumendu wa zira a tja: “Ena randje owami Legio, okutja ‘Kuzeze,’ orondu oweṱe ovengi!” 10 Neye wa kara pokuriyarikaṋa ku Jesus kutja eye a ha ramba ozombepo ozohakohoke poruveze ndo.
11 Nu popezu mbo pa ri orupanda orunene rwozombinda nḓaa ze ri meṋe yondundu. 12 Ozombepo ozohakohoke otji ze riyarikaṋa ku Jesus aze tja: “Tu hinda kozombinda nḓena, tu kahite mu zo!” 13 Jesus we ze esa kutja ze yende, nozombepo ozohakohoke arire tji za piti momurumendu naze kahita mozombinda. Orupanda aruhe rwozombinda mangara omayovi yevari otji rwa raukira morutjeṋe notjikara otjinene, aru kahita momuronga naru ṋiṋiwa i omeva.
14 Ovarise wozombinda va tupuka nave kaserekarera otjiṋa hi motjirongo na morukondwa rwehi. Ovandu va ya okukatara imbi mbya tjitirwe. 15 Nowo tji ve ya ku Jesus, nu tji va muna omundu ngwi ngwa ri nozombepo ozohakohoke a haama mbo, e nozombanda na kotora ozondunge ze azehe, arire tji va tira tjinene. 16 Nu imba mba munine otjiṋa hi va serekarerera ovandu imbi mbya tjitirwe komundu ngwi ngwa ri nozombepo ozohakohoke, na kozombinda.
17 Owo arire tji va ningire Jesus kutja aze mo mehi rawo.
18 Jesus ngunda ama rondo mokayaha, omundu ngwi ngwa ri nozombepo ozohakohoke otje riheka ku ye kutja a yende puna ye.
19 Nungwari Jesus ke mu yandjerere okuyenda puna ye. Eye wa tja nai ku ye: “Yaruka komuhoko woye, u keveserekarerere oviṋa ovinene Muhona mbye ku tjitire, na indu tje ku ṱire otjari.”
20 Omundu ngwi otja ya a kauta okutjivisa mehi ra Dekapolis arihe imbi oviṋa Jesus mbye mu tjitira. Nu avehe mbe mu zuva va himwa.
Omukazona wa Jairus, nomukazendu ngwa ṱuna kombanda ya Jesus
(Mt 9:18-26Lk 8:40-56)21 Jesus wa kondere rukwao munda mbwina nomuronga mokayaha. Nu poṋa mbo, meṋe yomuronga, otjimbumba otjinene tjovandu otji tja woronganena pu ye. 22 Nu Jairus, umwe wovanane wosinagoge, weya mbo, nu tja muna Jesus arire tje riwisire pehi pozombaze za Jesus, 23 ne riyarikaṋa tjinene ku ye a tja: “Okanatje kandje okakazona ke ri popezu nokuṱa. Arikana indjo u kayambeke omake woye ku ko, keveruke nu kehupe!”
24 Jesus wa ya puna ye, notjimbumba otjingi tjovandu tje mu kongorera, nu tjandje matji yende ama tji mu ṋee okuza kominda avihe.
25 Nu pa ri omukazendu ngwa verere omayuva we woukaendu tjinene oure wozombura omurongo na mbari. 26 Eye wa pangerwe i ozonganga ozengi tjinene nu a manene ouini we auhe mu zo e hi nokumuna ombatero, nungwari imbwi omutjise owo wa ryamena ko. 27 Omukazendu ngwi wa zuva ombuze ohunga na Jesus, notja tukutura motjimbumba nga tja vaza ku Jesus, na ṱunu kombanda ye okuza kongotwe, 28 ame ripura nai mu ye omuini: “Nangarire tji mba ṱunu kombanda ye uriri me veruka.”
29 Eye wa ṱuna kombanda ya Jesus, nomupupo wombinḓu ye au yanda tjimanga, neye we rimuna morutu rwe kutja wa verukisiwa komutjise mbo. 30 Tjimanga Jesus we rimuna kutja mu ye mwa zu omasa ngapiti, notja tanaukira kotjimbumba na pura a tja: “Owaṋi ngwa ṱunu kombanda yandje?”
31 Ovahongewa ve va zira nai: “Ove mo munu otjimbumba tjovandu tji tje ku woronganene kominda avihe, nu mo pura kutja owaṋi ngwa ṱunu kove are?”
32 Nungwari Jesus wa kara pokuyevayeva akuhe a mune ingwi ngwa tjiti nao. 33 Ingwi omukazendu tja tjiwa ihi tji tja tjitwa mu ye, weya ku Jesus ama tira nokuzezera, a wora ozongoro pozombaze ze ne mu raere ouatjiri auhe. 34 Nu Jesus opa tjera ku ye: “Muatje wandje, ongamburiro yoye ye ku vatere! Twende mohange, nu veruka komutjise woye.”
35 Jesus ngunda ama hungire omambo nga, otji kwe ya ovahindwa tjiva okuza koya Jairus nave mu raere nai: “Omuatje woye omukazona wa koka. Ongwaye tji mo kaenda komurungu okupa Omuhonge ouzeu?”
36 Jesus ka karere ko na tja na imbi mbyaa ve hungire, nungwari wa tja komunane wosinagoge: “O tira, panḓera mba pongamburiro.” 37 Nu Jesus wa tjaera ovandu avehe okuyenda puna ye posi na Petrus na Jakobus na Johanes, omuangu wa Jakobus. 38 Owo ve ya pondjuwo ya Jairus, nu Jesus wa zuva orurokoho rovandu mbu mave riri nu mbu mave uru tjinene. 39 Eye wa hita mondjuwo na tja ku wo: “Ongwaye tji mwakurunga nokurira? Omukazona ka kokere, eye wa rara uriri!”
40 Owo ve mu yora. Eye wa pitisa avehe pendje, a toora ihe na ina yomuatje novahongewa ve vetatu na hiti metuwo ndi mu mwa rarere ingwi omuatje. 41 Eye wa kambura omukazona keke na tja ku ye: “Talita kum,” okutja “Kakazona, ami me ku raere, penduka!”
42 Tjimanga omukazona wa penduka na utu okukawondja; eye wa ri omukazona wozombura omurongo na mbari. Novandu tji va muna otjiṋa hi, va himwa tjinene. 43 Nungwari Jesus we ve rakiza oukukutu kutja ave ha tjivisa otjiṋa hi kovandu, notja tja omukazona nga pewe ovikurya.
© Herero Revision Bible © Bible Society in Namibia, 2021.
