Markus 16 - Herero Revision Bible (HRR)

Ombendukiro ya Jesus

1 Nu esabata tji ra kapita, Maria Magdalena na Maria, ina ya Jakobus, na Salome va randa ovyomoro omuwa okukatwirisa na vyo orutu rwa Jesus. 2 Nu omuhuka omunene, meyuva etenga rotjivike, eyuva tji ra za nokupita, owo va ya keyendo. 3 Mondjira owo va purasana ave tja: “Owaṋi ngu me tu isapere ewe ndi potjinyo tjeyendo?” 4 Ewe ndo ra ri enene tjinene; nungwari tji va tara, va muna kutja oro ra isiwapo rukuru. 5 Nowo tji va hita meyendo va muna omuzandona ngwa haamene kokunene, a zara ombanda ombapa, nu arire tji va uruma tjinene.

6 Ingwi omuzandona wa tja nai: “Amu tira ko! Ami me tjiwa kutja mamu paha Jesus wa Nasaret, ingwi ngwa papererwe kotjikoroise. Eye wa penduka, imwi ke mo, tareye poṋa pu ve mu twire. 7 Nambano twendeye, kaserekarereye kovahongewa ve na Petrus; kutja ‘Eye me mu tengere po okuyenda kOgalilea, nu oku mamu kemumuna otja punga e mu raera.’”

8 Owo va pita meyendo nave tupuka, tjandje mave zezerisiwa i omburuma. Nu kave hungirire otjiṋa hi komundu, mena remuma.

Jesus me riraisa ku Maria Magdalena

(Mt 28:9-10Jhn 20:11-18)

9 Nu Jesus tja za nokupenduka movakoke omuhuka omunene wasondaha, meyuva etenga rotjivike, rutengatenga we riraisa ku Maria Magdalena, omukazendu ngwi eye ma pitisire ozombepo ozohakohoke hambombari. 10 Maria Magdalena wa kaserekarerera imba mbu yave kara puna Jesus, tjandje owo va ṱoruhoze, nu mave riri. 11 Nowo tji va zuva mu ye kutja Jesus u nomuinyo, nokutja eye we mu munu, kave kamburire ko.

Jesus me riraisa kovahongewa vevari

(Lk 24:13-35)

12 Kombunda yoviṋa mbi, Jesus we riraisa mosaneno yarwe kovahongewa vevari ngunda averi mondjira okuyenda pendje yotjihuro. 13 Nowo va kotoka nave serekarere kovakwao, nungwari ovakwao mba wina kave kamburire ko.

Jesus me riraisa ku imba omurongo na umwe

(Mt 28:16-20Lk 24:36-49Jhn 20:19-23Oviu 1:6-8)

14 Korusenina Jesus we riraisa kovahongewa omurongo na umwe ngunda averi pomariro. Eye we ve verera okuhinangamburiro nomikukututima vyawo, tjinga ave ha kamburire momambo wa imba mbe mu mwine tja penduka. 15 Jesus we ve raera na tja ku wo: “Twendeye mouye auhe, nu kazuvariseye Ombuze Ombwa komihoko avihe. 16 Ingwi ngwa kambura na papitisiwa ma hupisiwa komuinyo, nungwari ingwi ngu hi na okukambura ma pangurwa. 17 Imba mbu mave kambura mave pewa omasa okutjita ovihimise mbi: Mave pitisa ozombepo ozohakohoke mena randje; mave hungire momaraka omape; 18 mave kambura ozonyoka nomake wawo, nu nandave nu otjiṋa ngamwa atjihe otjizepe, kamaave munu otjipo; mave yambeke omake wawo kovavere, nowo ave veruka.”

Jesus ma twarewa keyuru

(Lk 24:50-53Oviu 1:9-11)

19 Muhona Jesus tja za nokuhungira kuna wo, arire tja twarewa keyuru na kakara pehi kokunene kwa Ndjambi. 20 Novahongewa va ya ave kazuvarisa akuhe, nu Muhona wa ungura puna wo, na zeuparisa omazuvarisiro wawo mokutjita ovihimise.