Mika ma yamburura ovanane vOvaisrael
1 Purateneye, va nane vOvaisrael! Kaweṋe mbu mwa sokutjiwa ousemba are? 2 Nungwari eṋe mwa tonda ouwa nu mwa suvera ouvi; eṋe mu purura ovandu vandje nomuinyo namu isa ko onyama komaṱupa. 3 Mu rya ovandu votjiwaṋa tjandje namu purura omikova kotutu twawo; mu teya omaṱupa wawo namu ve kondo otja onyama yomonyungu tji i kondwa. 4 Oruveze maru ya eṋe mu mamu ku ku Muhona, nungwari eye ke nokumuzira ko; eye ke nokupuratena kozongumbiro zeṋu, tjinga amwa tjita ouvi.
5 Muhona ma tja nai kovaprofete imba mbe pukisa otjiwaṋa tje: “Owo ngunda ave noviriwa okurya ve zuvarisa ohange. Nu ku imba mbe hi notjikurya okuvepa, owo ve tanda okuveetera ovita. 6 Vaprofete, omayuva weṋu yeya komaandero, ouṱuku mau ya ku eṋe, notji mu hi nokumuna ovirimunikise nokukara nomaukiro, motjimbe tjokutja mu pukisa otjiwaṋa tjandje.” 7 Imba mbe uka oruyaveze mave ṱisiwa ohoṋi, tjinga imbi mbi va uku avi hi nokurira ouatjiri. Owo mave susuparisiwa mohoṋi Ndjambi tjinga e hi nokuvepa eziriro, ndi mave undju.
8 Nungwari ami mbe urisiwa nomasa nOmbepo ya Muhona nousemba nouvanḓe okuraera Ovaisrael ourunde wawo. 9 Nambano purateneye ku ami, eṋe vanane va Israel mbu mwa tonda ousemba nu mbu mwa tanaura ousemba mouvi, 10 nu mbu mu tunga otjihuro tja Ndjambi, Jerusalem, komazikameno womazepero nowouhasemba. 11 Ovanane votjihuro ve pangura mena roviyandjewa vyombopero, novapristeri vatjo ve honga omatwako okutja ve sutwe ondjambi, novaprofete vatjo ve uka mena rotjimariva. Nu mu woveni ve ripura kutja mokutjita nao Ndjambi uri puna wo notji ve tja: “Muhona u ri puna eṱe. Kape notjipo tji matji ya kweṱe.”
12 Nambano mena reṋu, Sion matji twerewa otja ehi rotjikunino, nu Jerusalem matji rire etundu, notjivanda tjondjuwo ya Muhona matji rire ehwa.
© Herero Revision Bible © Bible Society in Namibia, 2021.
