Mateus 7 - Herero Revision Bible (HRR)

Okupangura ovakweṋu

1 “Amu pangura ovakweṋu kokutja amu ha pangurwa i Ndjambi, 2 Eye tjinga ame mu pangura momuhingo tjingewo mbwi eṋe mbu mamu pangura na wo ovakweṋu, nu tjinga ame mu saneke notjisanekero tjingetjo tji mamu saneke na tjo ovakweṋu. 3 Okutjavi tji mo munu okarupambaro ku ke ri meho romukweṋu, nu indji ondimbo ndji ri meho roye au hi nakuimuna? 4 Mo sora vi okutja nai komukweṋu: ‘Arikana mukwetu, kurama mbi ise mo okarupambaro meho roye,’ nu indji ondimbo ndji ri meho roye au hi nakuimuna? 5 Munatjavivi ove! Rutengatenga isa mo indji ondimbo ndji ri meho roye, tjazumba u sore okumuna nawa okunana inga okarupambaro ku ke ri meho romukweṋu.

6 “Amu yandja ihi otjiyapuke kozombwa, tjapo maze mu tanaukire naze mu nyondorora; nu amu yumbire ozombinda omawe omahuze, tjapo ozo maze ye tombo novikoti vyazo.

Ningira, paha, kongora

(Lk 11:9-13)

7 “Ningireye nu mamu pewa; paheye nu mamu munu; kongoreye nu mamu patururirwa, 8 orondu auhe ngu ma ningire ma pewa, ngu ma paha ma munu, nu ngu ma kongora ma patururirwa. 9 Nu omurumendu uṋe omukwate mokati keṋu, omuatje we omuzandu tje mu ningire omboroto ngu me mu pe ewe? 10 Poo tje mu ningire ohi ngu me mu pe onyoka? 11 Neṋe mbu mu ri ovavi tji mu tjiwa okuyandja oviṋa oviwa kovanatje veṋu, indu Iho ngu ri meyuru, tjiri, ke nokuyandja oviwa ovingi tjinene okukapita ku imba mbu mave mu ningire are?

12 “Avihe mbi mamu vanga kutja ovakweṋu ve tjite ku eṋe, eṋe wina nga rire mbi mwa tjiti ku wo. Inga onge ri omaheero wOmatwako wa Moses nowomahongero wovaprofete.

Omuvero omumango

(Lk 13:24)

13 “Hitireye momuvero okasina, omuvero mbwi mbu twara kombandjarero omuparanga, nondjira ndji yenda ngo ombupu, novengi mbe kayenda mu yo. 14 Nungwari omuvero mbu twara komuinyo owo okasina, nondjira ndji yenda ngo ye ura nouzeu, ovandu ovaṱiṱi mbe i muna.

Omuti novihape vyawo

(Lk 6:43-44)

15 “Ṱakamiseye ovaprofete woposyo; owo ve mu yendera mozombanda zozonḓu, nungwari tjandje owo, tjiri, ozombungu ozonyondorore. 16 Eṋe mamu ve zemburukire kovihape vyawo. Omiti vyomakuiya vi twako omandjembere are, nominanyiva vi twako omakuyu are? 17 Omuti omuwa u twako ovihape oviwa, nomuti omuvi u twako ovihape ovivi. 18 Omuti omuwa kau twako ovihape ovivi, nomuti omuvi kau twako ovihape oviwa. 19 Nomuti auhe ngamwa mbu ha twako ovihape oviwa u kewa, au yumbwa momuriro. 20 Neṋe ovaprofete woposyo otjinga amamu ve zemburukire kovihape vyawo.

Hi na pu mbe mu tjivirwe

(Lk 13:25-27)

21 “Kaye ngwi auhe ngu ma tja ku ami: ‘Muhona, Muhona,’ ongu ma hiti mouhona womayuru, nungwari ma rire ingwi porwe ngu ma yenenisa ombango ya Tate ngu ri meyuru. 22 Eyuva rombanguriro tji re ya, ovengi mave tja ku ami: ‘Muhona, Muhona! Eṱe twa zuvarisa ombuze ya Ndjambi mena roye, nu atu pitisa ozombepo ozengi ozohakohoke mena roye nu atu tjiti ovihimise ovingi!’ 23 Nungwari ami meve raere e tja: ‘Ami hi na pu mbe mu tjivirwe ko. Zapweye pu ami, eṋe vatjite wouvi!’

Ovatunge vevari vozondjuwo

(Lk 6:47-49)

24 “Nu auhe ngu ma zuu omambo wandje nga na kara nonḓuviro ku wo, wa sana nomundu omunazondunge ngwa tunga ondjuwo ye kombanda yoruuwa. 25 Nombura ya roka tjinene, nomupupo au ya, notjivepo tje riveta nomasa mondjuwo ndji. Nungwari oyo kai wire ko, tjinga aya tungirwe kombanda yoruuwa.

26 “Nungwari auhe ngu ma zuu omambo wandje nga na ha kara nonḓuviro ku wo, wa sana nomundu eyova ngwa tunga ondjuwo ye meheke. 27 Ombura onḓeu ya roka, omupupo au ya, otjivepo tje riveta nomasa mondjuwo ndji, noyo ai wire ai hahauka okumanuka!”

Jesus u nouvara

28 Nu Jesus tja manene okuhungira omambo nga, otjimbumba tjovandu arire tji tja himisiwa i omuhingo eye mbwaa hongo. 29 Eye we ve hongere otja ngu nouvara, nungwari ke ve hongere otja ozonongo zomambo tji yave hongo.